Un diya el rey Shlomo, el mas savido de los ombres, kijo provar la savidurya i la fidelita de su servidor, Beniya Ben Yehuda. El yamo a su servidor i le demando ke aga un echo, saviendo ke no puediya kompletarse. El Rey Shlomo disho a Beniya: Aryento de sesh mezes va aver la fiesta de Sukot. En esta fiesta me gustariya estrenarme un aniyo espesial, un aniyo majiko. Una persona triste ke mira el aniyo, se alegrara i una persona alegre ke lo mira se atristrara en un momento.
El servidor fidel salyo imediatamente al kamino para bushkar este aniyo misteriozo. Paso un mez, pasaron dos mezes, el servidor del rey kedo sin repuesta. Pasaron otros mezes, Beniya se fue asta las frontieras del reinado ma dingunos no teniya oyido avlar de un aniyo tan majiko. Beniya se frustro kon el tiempo. Kon todo su korason keriya kumplir el dezeo de su rey, ma malgrado ke ograsheyo muncho, no topo este aniyo. Tuvo una grande deziluzyon i depresyon porke estava dezesperado ke no aviya topado este aniyo majiko. Djusto un diya antes de Sukot en pasando por un kazaliko chiko, enkontro un djoyero viejo i prove. El servidor ke no teniya nada ke pedrer, demando tanbien al viejo djoyero: Dizeme senyor, alguna vez tienes oyido de un aniyo majiko ke aze ke los ke sufren se agan alegres i los ke estan alegres se konvertiran en sufrimiento? El viejo penso penso dos momentos, kito un chiko aniyo de kovre de uno de los kashones, gravo unas kozas ensima i se lo dyo a Beniya. El servidor ke en los mezes dalkavo aviya pedrido esperansa, echo un ojiko a la eskritura del aniyo i imediatamente se le avrieron los ojos. Lo remersiyo al djoyero i le dyo un sako de moneda de oro i se metyo al kamino para el palasyo del rey Shlomo.
Kuando el servidor yego finalmente al palasyo del rey, Shlomo estava yeno de alegriya, porke no estava siguro si Beniya iva tornar kon buen rezultado. El servidor entrego el aniyo a su senyor, el rey savio, lo miro i la sonriza de su kara desparesyo imediatamente. Todas las personas de la korte real, kedaron kuriozas para ver lo ke estava eskrito en el aniyo majiko i finalmente kuando lo miraron vieron estos biervos:
“MALGRADO TODO, ESTO TANBIEN PASARA”.
Esta simple fraze kontiene una verdad ke devemos guadrar en el korason. Aunke mos parese ke todo esta en muestra favor i estamos en el piko del mundo, devemos de akodrarmos ke todo se puede despareser algun diya. I a la kontra no kale ke mos olvidemos ke kuando estamos sufriyendo o tenemos diyas difisiles ke bivimos, tanbien pueden desapareser i ser olvidados komo ke si nunka egzistieron.
