En el dia de Rosh Ashana tenemos un uzo de meldar el “piyut” ke se yama “Et Shaare ratson leipateah – es tiempo ke las puertas de veluntas esten aviertas.” Este “piyut” mos konta kon una manera muy sensible la akeda de Yitshak Avinu. La konversasyon ke fue entre Avraam i su ijo, Yitshak uzavan de kantarlo en Ladino i munchos yoravan.
La alaha mos embeza ke un Hazan deve de kitar las lagrimas en el dia el este. Ma este dia tambien es una fiesta, el empesijo de la anyada nueva. I deke estamos yorando en el dia el este?
Los savyos mos kontan ke kuando fue destruido el Bet Amikdash todas las puertas de los sielos se serraron. Solo la puerta de las lagrimas estan aviertas siempre. Por esto en el dia ke es el empesijo de el djuzgo para los Judios, rogamos a el Todo Poderozo kon lagrimas. I el, viendo nuestra veluntad ke keremos tornar a El se apiada de nozotros i mos perdona.
Rogamos todos para todos los Judios este anyo ke seyga anyo de salud buena, kon pas, repozo, prosperidad i repozo para todos nozotros.
Tahel Shana uvirhotea – ke empese el nuevo anyo kon sus bendisyones, amen.
Tizku leshanim rabot – Para munchos anyos.
