Kada semana me estan demandando mi artikolo “mas presto; mas presto”. Tienen razon porke kon las fiestas Djudias no es muy kolay de publikar i de distribuir el Şalom al tyempo, en estos mezes de fiestas. I empesi a eskrivir bavajadas. La semana pasada eskrivi ke los muertos del Hizbullah eran mas de 35 ma kedo kon la primera edision. Oy unos kuantos diyas antes kero eskrivir sovre el Lebanon i sovre el kapo del Hizbullah, Nasrallah. Nasido en 1960 fue el dirijente el mas importante empesando del 1992. Ay 32 anyos ke esta dirijando esta organizasion ke es atada a la Persia. I miles de militanes lavoran para esta organizasion. Ay unas kuantas semanas ke vieron ke no es muy fasil de gerrear kontra Israel. El estado Djudio de punto de vista teknika, elektronika i de relasyones stratejikas kreo ke es uno de los payizes mas fuertes del mundo. Ayer la noche kuando el primer ministro Israelyano Netanyahu estava avlando en las Nasyones Unidas, sintimos ke los Israelyanos atakaron a una kaza en Beirut ande dizen ke morava Nasrallah, el kapo del Hizbullah. Israel dyo este haber. Ma los responsavles del Hizbullah - si kedaron dainda - no lo achetaron. Es diya de shabat, a las 3 de dospues de midi ke achetaron ke Nasrallah fue matado por los Israelyanos. Oy esto sintiyendo la radyo i las televisiones. No se lo ke keren los Israelyanos? Si keren ke Iran partisipe a esta gerra, esto no va ser muy fasil. Porke eyos estan mas realistos i no keren azer la gerra kon el estado Israelyano. No estamos entendyendo mizmo lo ke keren los Amerikanos. Keren o no la gerra kon el estado Persiano? Esto todo va ser un problem muy emportante en el Medio Oriente. Kada semana esto eskrivyendo ke kero PAS en el medio-oriente. Ma kreo ke esto es un suenyo. I no esto augurando.
