El anyo muevo ke mos trayga la sanedad, la felisidad, la abondansya, la kerensya i la pas en el mundo entero.
Esta fyesta es el aniversaryo del nasimyento del mundo porke; la data kuando Dyo kreo el mundo i el ombre empesa, antes de 5785 anyos fina oy.
ROSH-ASHANA es el presipyo del anyo.
En esta perioda kale agradeser todo lo ke Dyo el Todo Poderozo, mos dyo, kale remersyar, pensar a los errores ke izimos entre el anyo i tener la intisyon de rekuperarlos.
Es una grande opotunidad de ir a arrogar a la sinagoga.
Los alimentos sembolikos de esta fyesta son:
por tener un anyo dulse, komemos el dulse de mansana. En las noches de Rosh-Ashana kuando tornamos del kal i vinimos a kaza se dize en primero el Kidush. Se kome el dulse de mansana ke sinyifika, ke este anyo muevo va ser dulse del empesijo fina la fin.
- La prasa semboliza, ke los enimigos ke keren muestra maldad, se desapareskan.
- La espinaka es el simbolo de lo ke dizimos por muestros inimigos, ke los ke keren muestra maldad, ke se aleshen de mozotros.
- La datile ke se kome, semboliza ke todas las negreruras ke tengan fin de agora en delantre.
- La kalavasa es la sinyifikasyon de todos los zahutes ke azemos.
- El peshkado semboliza la azlaha, la abondansa i el pujar. Ke muestros zahudes pujen komo el peshkado. Una de las uzansas emportantes es: ke se kome la kavesa del peshkado u del kodrero, ke es la sinyifikasyon ke syempre estaremos a la kavesa de todo modo de akontesimyento en muestra vida.
La sigunda noche para pueder meldar la beraha sheeheyanu, en la meza kale ke ayga una fruta mueva ke no se komyo fina oy.
Esto es la uzansa i la fruta mueva es la granada.
Los granos de la granada sembolizan las mitsvot ke desidimos de azer en el anyo muevo.
La manera de pueder trokar el mundo empesa kon el trokamyento de mozotros mizmo en primero.
La boz del Shofar mos ovliga a kultivar muestra vida interyor kon la ayuda de la umilidad, el pardon i el amor.
Por esto, mos akodra ke devemos ser fondamantales para ke las bendisyones de la vida koryan al mundo entero kon el kamino de mozotros.
Keridos Lektores, espero ke el anyo muevo
Rosh-Ashana seya un anyo, yeno de sanedad, parnasa tova i felisidad para todos, i ke las gerras se terminen en el mundo entero inshalla.
