Kero empesar mi artikolo dizyendo ke la prensa turka en todo modo de medias esta empesando dizyendo ke Israel ay un anyo ke esta atakando Gazza. Dingunos no avlaron ni un byervo sovre el empesijo del evenimyento. No avlaron ni un biervo sovre los 1.200 israelyanos ke fueron matados, feridos i esklavos en las manos de los militanes del Hamas. No se si dainda estas almas estan bivas o no. Se dize ke dainda mas de 100 personas biven en las negras kondisiones de los militanes del Hamas. Malorozamente mizmo no se akodran ande se topan estos esklavos. Los repartieron en diferentes lugares i en diferentes kazas. Un anyo. Reelmente un tyempo bastante largo…
Dospues Israel atako los palestinianos, los militanes ke se topan en Gazza. I ke afito? 41.000 muertos (no se kuantos son los militanes del Hamas?); mas de 100.000 feridos; se avla de la destruksion de 135 ambulanses. Meshkitas, iglesias, ospitales, eskolas derrokadas kon las bombas. Es djusto ke los militanes del Hamas emplearon estos edifisios para eskondersen i para eskonder sus armas. Vimos ke de punto de vista armada, Israel esta bastante fuerte kontra los militanes del Hamas i kontra los estados ke keren atakar.
Es djusto ke los Amerikanos i los payizes Evropeos estan sosteniendo el estado Djudyo. Mizmo si syertos Amerikanos no keren mas dar apoyo a los Israelyanos, se estan espantando del lobi Djudio Amerikano ke va tomar pozisyon kontra eyos.
No savemos lo ke va afitar dospues de oy. Reelmente no es muy fasil de ver la PAS en el Medio Oriente. Ma esperamos su realizasion.
