Los moshkos son los musafires nonasperados de las tadres de enverano. Djusto ke estamos asentados en una guerta o en un balkon oyemos una muzika fina; esta muzika en verdad es un grito de gerra. Tenemos dos posibilidades: O mos tenemos de fuyir aryento o mos vamos araskar. Eyos son los “Drakula”s chikos, vampires.
Pensaremos ke estas seres se repozan diya entero i arekojen enerjiya, i kuando ampesa a eskapar el diya ampesan a ser los mas grandes kasadores (avcı) de la umanita. I si les plazes, yaman a sus amigos en dizyendo: Vini vini, topi una sangre muy dulse. Malgrado ke son muy chikos, mos inyervan muncho. Djusto ke estas para durmir, oyes akeya boz ke te buraka el esfuenyo “vizzzzzzzzz”. Su uniko dover es ruinar tu nochada. Siguro ke i mozotros keremos matarlos antes ke mos burake la karne. Ma no ay hayre. No se kuentos chaketones mos damos para aferrarlos. Se fuyen en dizyendo: No me puedes alkansar.
Antes ke enkashen sus algujas, deshan una saliva ke endormese el lugar para ke no mos apersivamos. Kuando sintimos una kemasyon o araskina, es ke ya eskapo su echo, se arto bueno bueno de muestra sangre, kito su alguja i se bolo. Ampesas a araskarte, mas te araskas, mas te da ganas de araskar. Si keres aferrarlas es emposivle, por ke siempre son eyos los ganadores.
No se deke, si estamos asentados 20 personas en una guerta, los moshkos enprimero vienen direktamente ande mi. Digo ke me moryeron, dingunos no se kreyen. De mi marido ke esta asentado a mi lado, ni ke se aserkan. Meldi en un lugar ke i los moshkos tienen preferensia de sangre. Ken save, tengo kuerro delgado, sangre dulse? Eyos ya saven.
Kuando se aserka el enverano, de pensar ke vamos enkontrarmos kon los moshkos, ya me amingua la alegriya de irmos a la kampanya. Agora ke ya ampesa a esfriyar el tiempo, ya me ampeso a alegrarme ke eskapimos kon estos vampires. Grasias al Dio ke no bivimos en el este del payiz, porke aya se topa munchos modos de moshkos, mizmo moshkos ke trayen hazinuras, viruses. En la Afrika ay un sorte de moshko ke se yama Anofel, ke traye malarya. Ay unos kuantos anyos ke mos vino un otra sorte de moshko ke se yama “moshko tigre”. Estos moshkos deshan una saliva muy toksika ke kema i aunfla el lugar i no pasa en manko de 3-4 diyas.
Ya se ke la natura tiene de menester de todo modo de sorte de animales, todos sierven a unas kozas ke no mos puedemos imajinar. Ma kualo aviya si no kreava estos moshkos?
