Roshashana es el tiempo kuando mos metemos enfrente del Dio, i le rogamos ke muestros dezeyos se realizen en el anyo vinidero. Ma, antes de todo, en primero, le rengrasiamos por todo lo ke mos dio. Le rogamos de darmos sanedad, i fuersa para pueder gerreyar kon las difikultades ke rankontramos kada diya.
Los obstaklos ke mos detienen de realizar muestros dezeyos, son muestras kreensas yerradas, muestros dezeyos irrealistos.
Antes de todo, kale ke akseptemos ke el Dio mos kreo a kada uno, kon diferentes talentos, i ke dinguno de mozotros es perfekto. Ma, mezmo ke no somos perfektos, el Dio mos dio estos talentos para ke los empleyemos. El Dio mos embiya tambien munchas oportunidades para ke los puedamos empleyar.
La persona ke se eskonde de sus defektos, o ke inyega sus defektos, no puede tener objektivos realistos. Si konosemos muestros talentos, i akseptamos muestros defektos, puedemos alkansar a lo ke keremos.
Konoserse a si, i kererse bien a si, toma tiempo. En lugar de demandarme de mi para mi, ‘komo puedo pareser a esta persona ke es tan reushida?’, Kale ke me demande, ‘komo puedo empleyar mis talentos, i las fuersas ke el Dio me dio, para pueder realizar mis objektivos’. Naturalmente, el dezeyo ke tengo, kale ke akorde kon mi karakter. En siendo ‘yo’, en siendo pasensiozo, i en empleyando mis fuersas, puedo reushir a alkansar mis objektivos.
Reushir a alkansar muestro objektivo de la primera vez, munchas vezes, no es posivle. Munchas vezes mos yerramos, no puedemos reushir. Mezmo Moshe Rabeno, no pudo reushir a kitar a los judios de Ejipto, mezmo ke el Dio le aviya prometido de ayudarle.
Munchas vezes, el Dio mos prova, en permetiendomos ke agamos yerros, porke El kere saver ke karar mos estamos kreendo en muestro objektivo.
El Dio mos djuzga segun los eforsos ke azemos, i no segun muestra reushita. En el judaizmo, ‘reushir es pueder konoserse a si’. Kale ke digamos, ‘esto azyendo todo mi poder kon mis senseros eforsos, para pueder reushir’.
Vos sueto a todos una anyada buena kon sanedad i alegriya, i vos sueto de pueder realizar vuestros dezeyos en el anyo muevo.
