Esta fraza la topamos en la vizion de Ezechiel, uno de los mas grandes de muestros profetas, ke bivyo en Babel en la epoka del primer Bet Amikdash.
En el kapitolo ocho de este livro de Ezechiel vemos su vizyon mostrando al puevlo de Yerushalayim, sirviendo a los idolos en el mikdash santo. Ezechiel ve el puevlo pekando de todo manera… Su vizyon ve un idolo en el enterior del Templo… Figuras de animales defendidos por muestra ley, i mujeres yorando en el entorno del Dio Tamuz, Dio babiloniyada. En su vizyon, el profeta ve djentes enkorvandosen delantre el sol i todo modo de aktos defendidos por muestra ley. Tamuz es domuzi, Dio babiloniyada de la fertilida i sigun los idolatres, el muere kada enverano i se arebive en invyerno. Las mujeres teniyan uzo de azer seremoniyas kada anyo i de yorar a sus idolos, a Tamuz. Al interior del Bet aMikdash en su vizyon el profeta ve 25 ombres ke aboltan la espalda al santuvaryo, todos tornados verso el Oriente, bendizyendo el sol i enkorvados. Tamuz el Domuzi, la idola babilionada i los ebreos tomaron los nombres de Babel para nombrar sus mezes, komo Tamuz. La vizyon de Esechiel salyo djusta.
Unos kuantos anyos despues, Babel kon su armada entro a Yerushalayim destruyendo el Bet aMikdash. Lo kemaron el 9 Av (Tesha Beav). Todos los moradores de Yerushalayim fueron yevados al galut a Babel. El konosido Galut de Babel viniya de ampesar.
Muestros savios disheron a la orgolyoza Babiloniya “Oy kematesh un Templo ke ya era kemado por muestros pekados. Un mikdash ande vos enkorvatesh delantre figuras kreensiyas defendidas por muestra santa ley”.
Muestros pekados son la kavza de muestras dezgrasias ke son la vizion de Ezechiel es una vizion para todos los tiempos. Los profetas puediyan ver i sentir evenimientos de antes. Eyos son atados al grado de la alma ke se yama “Haya”.
Mos akodraremos ke la alma tiene 5 etapas: Nefesh, Ruah, Neshama, Haya, Yehida.
El Haya se ve mas muncho en las mujeres ke los ombres.
Bendicho seya el Kriyador i ke mos amostre siempre el kamino derecho. Amen.
