Muy Keridos Korelijionarios,
Dospues de “Rosh Ashana” i “Yom Kipur” ke lo sige, alkansamos a “Sukot” i “Simhat Tora” ke son “fiestas de Tishri” i kon esto empesamos a el 5785en anyo de nuestro kalendario donde suetamos ke seya una anyada de sanedad, prosperidad, pas, union i amor entre nozotros.
Penso ke estos dias es el periodo el mas apropriado de aderesarmos al El Todo Poderozo i prezentar nuestras rogativas por el anyo nuevo:
“Tihle Shana Vekilelotea Tahel Shana Uvirhotea”
Keridos ermanos. Esto siguro ke kada uno de nozotros esta bien konsiente ke estos tiempos son el periodo apropriado tambien de efektuar nuestro egzamen de konsensia i de desidar por reglar nuestras vidas konforme a los preseptos de nuestra ley i ke no es menester de indikarlo otra vez.
Esto lo savemos todos nozotros kreo i ke ya no mankaremos de profitar de esta oportunidad.
En esta okazyon lo ke kero yamar a vuestra konsensya en partikular es ke devemos ser mas metikulozos, voluntarios i insistientes de enkulkar a nuestros ninyos todo lo ke egziste en nuestra kultura en todo modo de senso.
Ya es savido ke es muy fasil de ayegar a los medios de komunikasion i informasion en esta epoka, i por kontra es muy difisil de pueder apartar entre lo korekto i lo yerrado. Es por esto ke es muy importante de armarlos a nuestros ninyos kon las valores de nuestra fe i de nuestra kultura.
“Veshinantam Levaneha Vedibarta Bam”
Siendo ke nuestra eskola tiene un rolo muy importante en este kampo kero suetar una anyada de estudyos yena de reushidad a los dirijentes, profesores i a los elevos de la eskola en estos diyas del empesijo eskolar.
Keridos korelijionarios. Esto siguro ke no mankarash de valorizar la importansa de salvoguadrar i mantener nuestras institusiones i fondasiones en esta epoka, sovre todo en siendo una komunidad ke se esta enviejesiendose i amenguandose. Es por esto ke kero rengrasiar i agradeser a los dirijentes de nuestra komunidad empesando de los dirijentes sentral asta los dirijentes de las instutisiones akompanyandolos kon mis bendisiones todo en yamandovos a darles una mano de ayudo tanto ke puedesh.
“Yeshalem Ashem Paolam Utei Maskortam Shelema Min Ashamayim”
Keridos ermanos. Estando siguro ke seran akseptadas nuestras orasiones i rogativas ke alsaremos komunamente a El Todo Poderozo dentro nuestras sinagogas en estos tiempos yenos de moralidad i emosiones, vos sueto una anyada yena de sanedad, prosperidad a vozotros kon vuestras famiyas, keridos i serkanos todo en bendizyendovos kon todas las bendisiones de nuestra Santa Tora.
Tisku Leshanim Rabot / Shana Tova Umeusheret
Rav İsak HALEVA
Gran Rabino
