Kuando la armada rusa se aserko a Auschwitz en el empesijo del anyo 1945, los nazis vazyaron el kampo de eksterminasyon. Los prizonieros fueron ovligados a kaminar a pie fina Alemanya, lo ke es nombrado komo la Marcha de la Muerte.
Los nazis estavan tirando a los ke se estavan guadrando atras, a los ke mas no estavan puediendo kaminar. Se esta estimando ke mas de 15.000 personas murieron en Neustadt Glewe, serka de Frankfurt en Alemanya. Neustadt Glewe era un "kampo de lavoro".
La manseva de Auschwitz sovrebivio la marcha ma estava muy hazina, probablamente kon tifus. Teniya muncha fievr i apenas estava puediendo meneyarse. Siguramente no estava en kondisiones de lavorar. La mujer judia responsavle de las barakas, le konsejo de irse a la enfermeria. Si estava rejistrada en la enfermeria, iva ser liberada de lavorar.
La enfermeria era unos tres blokes de leshor de las barakas, ma komo no tenia fuersa, a la manseva le tomo dos oras a arivar a la enfermeria. Kuando arivo, vido a los hazinos, medios muertos, desmudos enriva de las kamas, porke kuando un hazino viniya a la enfermeria los doktores le kitavan la vistimienta suzia i la kemavan.
La manseva tenia una shemiz de nui en la baraka ke de una manera la avia salvado de Auschwitz. No puediya kedarse dezmuda en la enfermeria. Se desido de tornar a la baraka para tomar su shemiz de nui. Empeso a kaminar arastando su puerpo.
La mujer responsavle de las barakas la vido i le disho de echarse para deskansarse un poko antes de tornar a la enfermeria. Komo la manseva no tenia fuersa mezmo para meneyarse, aksepto su konsejo i se echo un poko. Unos kuantos puntos duspues, el shef de las barakas le disho ke no era menester de tornar atras a la enfermeria. Los nazis avian kitado afuera todos los hazinos i los avian matado.
Un mez duspues, la manseva fue liberada. Se kazo, tuvo ijos, inyetos i bizinyetos. La manseva es mi madre, Perel Schulkind. Mi madre dainda esta en vida i esta sana. Ke biva munchos anyos!
Eskrito por Chaya Sarah Silberberg
