La semana pasada tuve la okazyon i el plazer de vijitar la ekspozisyon de la grande artista “Sheila NİYEGO”.
Despues ke termino su edukasyon en el etranjero, eya torno a Estambol en el anyo 1978.
Despues ke torno, en el anyo 1993, se entereso en el arte kon la pintura, empeso en la atelye de “Gökhan Anlağan” i lavoro kon el durante dos anyos. Despues, lavoro sesh anyos kon “Mahir Güven”. Los sesh anyos de alkavo, esta lavorando en su propya atelye kon “Altan Çelem”.
En estos anyos kontinuo a partisipar en las ekspozisyones kolektivas i organizo kon muncha aplikasyon ekspozisyones personales.
El sentido del arte de Sheila es:
“A vezes la sonriza en la kara de un ajeno,
A vezes la perfeksyon de la natura,
A vezes las emosyones eskondidas en un momento spesyal me estan provokando…
Lo ke veyo kon mis propros ojos, i lo ke syento en mi korason, syento la nesesita de pintar.
Kreygo ke la vida es un ermozo viaje ke deve de kompartirse kon todos.
Kero kompartir kon vozotros tambyen las refleksyones de mi propyo viaje”.
Las identitades eskondidas,
“En realita yo so tu, i tu sos yo.
No importa ke maska,
Mis ojos estan dezmudos
Mis ojos son el espejo de mi alma.
Eyos no dizen mintiras
No se pueden guadrarsen de detras las maskas.
Vamos, estas dispuesto para kitarmos las maskas?
Yo sere tu”…
“SHEİLA” asistyo a munchas ekspozisyones emportantes kon pintores famozos endjuntos i organizo tambyen munchas ekspozisyones personales.
En kada tablo puedemos ver ekspresyones i kolores diferentes ke mos dan a entender lo ke esta sintyendo eya mizmo, kuando esta pintando.
Empesando del anyo 1997 fina oy partisipo a ekspozisyones en Estambol, en Barselona, en Londra, en Bodrum, en Izmir, en Ankara i otros lugares.
Kero felisitarla por su ovra karakteristika i por su talento espesyal.
Reushita buena ke tenga.
