Noche de Shabat… Era en los primeros dias kuando estava en el ospital… Me sintiya sola i triste, leshos de mis keridos, de la meza familiar… El ospital no es partikularmente un lugar alegre, kon su golor, kon sus bozes de sufriyensa i esperansa, i sus paredes blankas. Me estavan kaminando en el koridor kon la siya de karuchas, i pasando delantre de puertas avyertas, mos estamos suetando “REFUA SHELEMA”. En una de las kamaretas vide un ombre asentado en la kama kon la kipa en la kavesa meldando, me kedi un punto, su mujer vino al lado de mi i me demando mi alkunya. Le dishe FİLİBA. Se kedo penseryoza. “Aviya una Madam Filiba ke un enverano entero mos dyo lesones de İvrit - Tora en la Keila de Caddebostan…” "Esta Madam Filiba so yo” Se echo en mis brasos, me bezo la mano kon tanta amistad ke me meti a yorar, yo ya me aviya olvidado de este enverano de antes 30-35 anyos.
No me sinti mas ni sola ni hazina… Un ayre de amistad me entornava… Un rekuerdo del pasado de diyas de alegriya i de unyon, de tantas haverot keridas… De tantas figuras de ermandad…
