Kibutz Maagan se topa al bodre de la mar Galile.
El 29 Julio del anyo 1954 izieron una seremoniya de komemorasyon para el parashutisto, Perez Goldstein ke muryo en un kampo de konsentrasyon. El era tanbien el fondador de este kibutz. Goldstein era un kombatente del Palmach.
Un diya muy ermozo de Julio se selebro una seremoniya en el Kibbutz Maagan, para dedikar un monumento a la memoria de Perez Goldstein, el miembro prensipal ke fundo el kibutz. En la Sigunda Gerra Mondial, salto kon parashut ensima de la Yugoslavia ke estava okupado por los nazistos. Ma despues kuando paso a la Ungariya, fue aferrado i mandado a los kampos de konsentrasyon. Su mision era de salvar a los judios de la Evropa.
En esta seremoniya aviya 2700 personas. Entre eyos se topava el primer Ministro, Moshe Sharet, los lideres de la rezidensya, los veteranes del Palmach, el sekretario jeneral de Histadrut Mordehai Namir, Yigal Alon, Teddy Kolek, los parashutistos ke tornaron sanos i salvos de la mision en Evropa, sus famiyas i sigun los jurnalistos, toda la aristokrasiya del payiz. Yitzhak Ben Zvi, el prezidente del paiz tanbien iva partisipar a esta seremoniya ma el estava en otra seremoniya en “Yad Vashem”. El prefero enbiyar una karta kon palavras de felisitasyon.
La seremoniya ampeso kon la prezensia de la “Guardia de Onor”. Se kanto la “Hatikva”. Un soldado meldo la orasyon de “Yizkor”. I el padre de Perez Goldstein alevanto la kuvierta de ensima el monumento.
El plano era de lansar sovre la djentoria, la karta de felisitasyon del prezidente por un avion del Tsahal. Ma no fue akseptado, sovre esto el “Klub de Aviasyon de Israel” tomo esta karga sovre el. Dos aviones Piper, se alevantaron. El pilot en kijiendo soltar la karta, la karta kayo en basho i en kijendo alkansarla, peryo el kontrol del avion. El avion se abolto i kayo ensima de la djentorya. En este terivle aksidente 17 personas muryeron i 25 personas fueron firridos.
El komite de investigasyon para investigar el aksidente, desido ke el pilot Uri Galin fue responsavle por ser imprudente. Ma el prokuror disho ke por modo ke no ay provas sufisientes kontra el piloto, kale suspender el proseso.
