Anyada buena. I para kada anyo mijorado. Viernes la tadre, noche de shabat i diya de shabat izimos tanit para el diya de Kipur. Ay anyos ke me vo al Neve Şalom el diya de Kipur. Kuando vine a kaza antes de las sinko i media mi mujer empeso a dizir komeremos, dospues vamos a kedar tadre. Ya saviyamos ke se puediya komer asta las 18.15. Eskapimos verso las 6 de la tadre. Bevyendo muestro kafe sali de kaza antes de las sesh i un kuarto. Tengo un kamino de kinze puntos. I ya se ke en el Neve Şalom empesan 20 o 30 puntos mas tadre. No so un Djudio muy kasher i me esto indo a la sinagoga kon la araba. Esta vez preferi un kamino ke fue una desgrasia. I vine a las syete al Neve Şalom. Aserkandome de la Sinagoga esto vyendo el Hazan Aşer Levi i su mujer ke estan salyendo de la sinagoga. Se estavan indo al Kal de los Italianos. Ribi Aşer me disho ke aviya solo 9 personas i komo no se formo el minyan dyeron karar de ir al kal de los Frankos ke se topa a unos kuantos puntos del Neve Şalom. En primero me ize pishman porke no sali mas presto de kaza! I kon mi prezensia ivamos a ser un minyan kumplido. Ma si ay este modo de perikolos, los gabayes deven de telefonar a lo manko un diya antes i deven demandar si tengo la intision de vinir al Neve Şalom. Si bushkavan a 15 personas no devian de bivir dingun problem. Reelmente es el kal el mas konfortable kon su klima i ay una orasion egzekutada kon grande reushita. Devemos de rengrasiar los hazanes Aşer Levi i Natan Siliki por sus lavoros.
El gabay, Yakup Akohen lavora a lo manko los 20 anyos dalkavo para el Neve Şalom. Ya puede ser mizmo mas. Ma malorozamente dingun mansevo no salio para ayudarle. Ma kreo ke el anyo ke vyene van a telefonar a los yahides para realizar el minyan. No kero eskrivir mas sovre este sujeto.
Kon los yahides de los italianos eramos serka de trenta personas i se realizo una orasion bastante reushida.
Demandi a la direksiyon de la komunidad kualo era la partisipasion de los miembros de muestra komunidad el diya de Kipur? Todos los djudios estan viniendo para el Shofar a las sinagogas. Ma solo para la Neila. No la primera noche. Dospues del 7 Oktobre 2023, syertos miembros de la komunidad se estan espantando de ir a las sinagogas mizmo si la polisia esta tomando grandes prekosiones. Vemos ke este anyo los ke vinieron para el shofar a la sinagoga son serka la mitad del anyo pasado. El anyo pasado no aviamos dainda bivido el 7 Oktobre. Es djusto ke la komunidad se esta amenguando i se esta envejesyendo. Ma esto puede ser 5 a 10 por syen. Devemos envitar los mansevos para ke vengan a las sinagogas kon sus ijos. Este modo a lo manko una partida de estos mansevos van a empesar a vinir a las sinagogas a lo manko diya de Kipur.
Para kada anyo mijorado.
