En el muzeo de “Tierra Santa” en Yerushalayim estan prezentando piesas del arte del Serkano Oriente i sus kulturas de la epoka del Tanah.
En estos diyas el muzeo prezenta la ekspozisyon KUMA, ke es la ovra de Eitan Rosenzweig.
Eitan era un artisto mansevo ke iva tener un grande avenir. En 21 de Noviembre 2023, el kayo en Gaza kuando teniya 21 anyos.
En esta ekspozisyon metyeron la ovra dalkavo de Rosenzweig, yamada “Kuma”, nombre en arameo. Eitan kijo pintar kon la tinta ke eskriviyan los soferes espesyalizados en los tekstos sagrados sovre el pergamino. Ma komo no fue posivle, lo kreo kon la tinta de muestros diyas.
Kuma es una megila (scroll, rulo) de 3 metros de anchor. Rosenzweig lo pinto en el tiempo de la Koronavirus. El lo desino kon una punta de pluma ensima de ropa. Esta teknika i el nombre de la ekspozisyon mos amostra su pasion para la Sefer Tora. La megila kombina sitasyones del Tanah, Talmud, Kabala, Kantikas en ebreo, filozofiya de la kultura del oriente leshano i de la istoria arkeolojika. En el arte de Eitan se topan tanbien animales i personajes ke se topan en el Tanah i objetos sagrados. Esta megila fue desinada en preto i blanko. Para entender este arte kale mirar muncho tiempo para deshifrar la majiya ke kontiene. La figura de la megila ampesa kon el pasaje bibliko “Leh Leha” i avansa asta la destruksiyon del Templo i finalmente asta el renasimiento. La madre de Eitan, Hagit ke se topo en la aviertura de esta eksibisyon, disho ke su ijo ampeso a tener la pasion para el antiguo kuando topo una piedra de antes 3000 anyos en una ekskursyon kon su klasa. Esta piedra del tiempo de la Edad de Bronze tanbien, aparese en la ekspozisyon.
La madre konto tanbien ke Eitan estudio italiano, arabo i se ambezo a meldar i eskrivir el ebreo antiguo i hiyeroglifos ejipsyanos. A 16 anyos, ampeso a estudiar makroekonomiya i mikroekonomiya, psikolojiya i sosyolojiya i resivyo un rekonosimyento del Ministerio de Edukasyon. Siempre bushkava oportunidades para enrikeser su mundo interior. Vijitava muzeos aryento i afuera de Israel. Kuando estuvimos en Londra mos ivamos kon sus ermanos a diferentes atraksyones ma Eitan preferava pasar su tiempo en el Muzeo Britaniko. Hagit adjusto ke la Tora era muy emportante para el i lo yevo a una fuerte koneksyon kon el hasidizmo, los livros sovre la fe, la etika i el Talmud.
Muestra perdida personal es muy grande. Su mankura la sintimos kada diya. El teniya talentos eksepsyonales. Para mi esta ekspozisyon es una forma de sintir ke Eitan esta siempre kon mozotros.
