Lian Penso Benbasat, esta investigando unas markas de munchos anyos de kultura etnika i tradisyonal, gizados o mupakes. Esta en la radio Karnaval, kon la Akademia de Artes de Mupak (Mutfak Sanatları Akademisi) kon sus podcasts. https://open.spotify.com/episode/0nPMMQNJFPWSx5U8uDBhUO Kada semana kon un musafir diferente. Konsejas sovre las komidas ke pasan de una jenerasyon al otro. El nombre de su kanal es “Esta ijika esta syempre ambyerta, tornar a tus raizes.”
El podcast dalkavo de Lian, mos vino muy konosido para los ke pasan los enveranos en la izla Buyukada/Prinkipo. Fue sovre la Patiseriya de Buyukada. Den diya en diya esta chika patiseriya se esta azyendo mas renomado por los ke vyenen a vijitar la izla. Todos ke vyenen, ya saven kualo keren komer, borekitas de patatas, de berendjena, borek kon krema, kon asukar o kon kezo. Borekitas kon lokum, galetas, biskochos, milfoyes. Desde 1955 asta oy, está en el charshi de Prinkipo fin agora, kada demanyana tyene delantre muncha djente asperando para meekar kozikas kayentes ke salyeron muevos del orno.
Komo se izo este kadar de famozo? Komo se ambezo a gizar un poko a la Grega?
Hüseyin Karayaprak mos konta ke kuando estava lavorando komo un chirak en Kartal (es un barrio enfrente de Prinkipo) un diya kedo sin echo. Un amigo ke era mas profesyonel de el, lo mando a Prinkipo al lado de Niko Mundi, ke era un pastelero famozo. Empeso a lavorar i ambezarse mas munchas kozikas de el i de la mujer. Fin a 1990 lavoro al lado de eyos. Despues Mundi la dyo la botika a un otro merkader. Huseyin se izo vendedor de kaye. Despues avrio la botika de agora en 1991. Desde este tiempo syempre lavoro kon su mujer, agora kon sus ijos, de la demanyana fin a la noche kon muncha ardor. Syempe kedo amistado kon su patron viejo, Niko Mundi. Moraron en un apartamento ariva, fina ke se izo hazino i no pudo vinir mas a la izla. Hüseyin se fue a la Gresya a verlo.
Desde munchas anyos, los gustos se mesklaron kon los gregos i kon los djudyos. La primera borekita kon lokum salió de esta patiseriya, ambezado de los djudyos. Hüseyin mos konta, nunka no trokaron los materyales ke utilizan, desde su fundasion.
Los videos de podcast se pueden ver en el YouTube. No son solo travados de botikas, en vezes en una kaza de la izla Burgaz kon Aynur Önay. Kon una prezentasyon ke se ambezo de su nona; un börek de kalavasa, echo en kaza, kon yufka pronta, kezo, kalavasa, un poko de prishil, guevos i azete. Muy fasil i se esta vyendo muncho porke esta muy savrozo.
Despues komidas de mübadele (troko de populasiones). Una komidika ke se gizava en Girit, ambezado de la nona, senyora Guzin. “Köfte de Izla i komida de tomat. Esta famiya vinyeron a İzmir de la Izla Girit en 1924.
Una damma ke mora en Kurtuluş, Senyora Marinne Kaburga. Mos konta komo se aze un ligado bien delgado i blandiko. Se ve ke es muy savrozo. Bendichas manos a todos.
Mas kozas, komo se azen bulemikas de espinaka de Estambol. Lezbuniye de Silvan. Komida ke se yama Maratalı es vinido de Girit. Armiko de tomat gizado de la tiya de Lian.
Komo vos konti, en vezes botikas muy nostaljikas, en vezes gizados tradiyonales de kaza. Syempre kontados kon kara riyente i muy intima. Vos konsejo de segir esta ijika en sus videos. Reushita buena, Lian.
