En los roles ke djugi en 35 anyos, entri en munchos karakteres, seya komediya, seya trajediya, seya drama. Atorgare, lo mas ke tomi plazer fue roles de istoryas de vidas reel i de mujeres korajozas, komo Sarah Bernhard, komo Donna Gracia Nasi, Golda Meir, Irena Sendler, etc. En djugando sus vidas, kedi kuryoza komo una mujer puede parvinir a fondar un teatro, komo una mujer puede fondar un paiz i otra puede salvar 2500 kriaturas de los kampos de konsantrasyon en no syendo djudia. Ma el proverbo dize:
“Kuando una mujer se mete a la kavesa una idea, mijor es kortarle la kavesa ke kitarle la idea de la kavesa .”
Agora vos va avlar de una mujer no solo korajoza, de una mujer ke da luz, ke informa i aklara munchas mujeres kon su saverisyo, kon su sensya, kon sus egzemplos, kurto una biblioteka biva.
La otra semana, unas kuantas amigas fuimos a vijitarla a muestra kerida profesora, SİLVA FİLİBA, ke esta en el ospital OR AHAYİM.
Munchos anyos antes, tuve el onor de ser su vizina i fui testigo de verla kada diya, luvya, inyeve, friyo, kalor, indose a partajar su sensya kon grande plazer i pasensya. No ay ken no la admire por su memorya maraviyoza, (bli aynara) por sus kuentos, por su saverisyo de la biblia i por sus eskritas maraviyozas.
Atras munchos anyos, kon Madam Filiba, me paso un kavzo por la kavesa, tanto me desho trasa, malgrado ke paso tantos anyos ke no pude olvidar.
Kuando eskapa el mez de mayo, tengo uzo de alimpyar la kaza de la Ada. Una demanyana del mez de Junyo, despues de mandar a los ijos a la eskola sali de kaza para irme a tomar el vapor de mueve i sinko.
Yo esto kon dos mosas, dos validjas yenas de bavajadas i dos saksis de rozas. Asperando ke va pasar un taksi, inyervoza ke va peryer el vapor, kon chapetas, kon asigo i la sudor por demaziya. Por siguro esto vistida mas neglije porke me va ir a penar.
Ensupito del apartamento de al lado sale madam SİLVA FİLİBA kon el marido ya este en ganeden, (eramos vizinas en Şişli) bien vistida, en la mano su fishu de dantela i un livro de ley.
Kuando me vido de vista vino allado:
--- Hag sameah Forti… hayrola demanyana matrana este hal, kualo tyenes hazina estas?
--- No madam Filiba, no esto hazina ma esto muy inyervoza ay media ora ke esto asperando taksi i no esto topando… nada no es, va peryer el vapor!
--- Ande te estas indo dia de moed kon vapor?
--- A la Ada, alimpyar la kaza i ya kedi muy tadre
--- (kon una boz dulse) a la Ada? Alimpyar la kaza? Oy es moed, oy es primer diya de Shavuot.
Me disho otra una vez, “Hag Sameah” i se fue. Yo, akea mirada triste no me la puedo olvidar. Akeas oras no topi de pensar i me averguensi muncho.
Yo ke era una buena eleva de la mahazike tora i ke este en ganeden, del sinyor Nisim Behar, komo pude azer este modo un yerro?
Kerida Silva Filiba, si estas meldando esta eskrita, kero ke sepas, despues de akea demanyana, nunka no me olvidi del diya santo de Shavuot.
