En 1980 Alain Zivie, un ejiptologo (el ke es eksperto en la syensya de Ejipto) empeso a ekskavar una tumba en la roka, en Sakara, un lugar muy serka de Kairo ande se topa el simenteryo de los paros i de sus familyas. En poko tyempo entendyo ke esta tumba teniya una koza ekstraordinarya, porke deskuvriyo ke la tumba aparteniya al Vezir (Ministro en la epoka Otomana) “Abdiel”, a su mujer “Tauret” i a su ijo “Huy”. Entre las kozas topadas en la tumba se topava la lista de los ofisyos i fonksyones ke el aviya echo en su vida. La tumba estava al lado de las tumbas del Paro Akhenaton i de la Reyna Nefertiti.
Este nombre de “Abdiel” es un nombre semitiko i no se enkuentra en la lista de los grandes ombres de Ayifto (Ejipto). ABDI-EL kere dizir “el esklavo de Dio” o “el sirvyente de Dio”. En Pesah meldamos en la Hagada el pasuk “Avadim ayinu...” es dizir “Esklavos eramos...” La forma de este nombre parese a “Daniel” ke kere dizir “El D. es mi djuzgador”, (Dan=Din) o a “Rafael”, ke vyene de “Refua” i ke kere dizir “El D. me kuro” o a “Mikael ke kere dizir “Ken komo D.”
Lo ke savemos sovre este ombre es la lista de los titulos, de las fonksyones ke el aviya echo komo Vizir. A empesar el es “el prezidente del payiz” el Vizir ke manda. Este titulo se repite munchas vezes. Otros titulos son “El akonsejero de Paro”, “El prezidente de toda la tyerra”, “El jeneral de los jenerales”, “el ambasador del rey” (en el sentido militar), “el responsable de las mujeres del rey”, “el responsable de la edukasyon de los ijos del rey”, “EL SERVIDOR DE ATON”.
Aton es el dyo uniko ke el paro İkhnaton o Amenhotep IV ovligo el payiz a kreyer. İkhnaton no keriya el politeizmo, ke kere dizir kreyer en munchos dios. Aunke tuvo muncha opozisyon de los saserdotes (los papazes de Misrayim de akel tyempo), su voluntad fue akseptada durante su vida.
Despues ke muryo, los saserdotes, para no perder sus poderes, tornaron al politeizmo de muevo. Akhenaton bivyo en el siglo14 A.E.K. (Antes de la Era komun) i reyno entre los anyos 1350-1330 A.E.K. (Antes de la Era Komun). Su mujer era la famoza Nefertiti. La mas ermoza de las reynas de Ayifto.
Nefertiti
Dos kozas azen kreyer ke Abdiel i Yosef haTsadik puedriyan ser la mizma persona. Su nombre Abdiel (Avad-El) i su kreyensa en un solo Dio. Aunke savemos ke Abdiel fue un Misri, uvo munchos etranjeros ke fueron fonksyonaryos del Estado en la epoka de los Paros. El nombre Abdiel es un nombre Semitiko i etranjero entre los nombres de Misrayim. Yosef ke era un etranjero, tuvo fonksyones altos en el Estado de Ayifto. La kreyensa de Abdiel en un solo dio mos da a pensar otra koza: Si es el ke fue detras del Paro İkhnaton para kreyer en un solo Dio, o si es el ke ensenyo a İkhnaton la kreyensa en un solo Dio. Komo fue responsavle de la edukasyon i enstruksyon de los ijos del Paro, komo fue akonsejero del Paro, puedemos bazarmos sovre la sigunda teoriya tanbyen.
Fuente: Alain Zivie
