Esta semana, al lugar de eskrivir sovre un personaje relatado al mez, eskrivi sovre un personaje importante i enteresante relatado a los evenimyentos ke estamos bivyendo.
Shmuel haLevi ben Yosef, tambyen konosido komo Ismail ibn Naghrillah (993-1056) nasyo en Merida, Espanya, (en la parte sentro-oksidental de la peninsula iberika), ke entonses estava debasho la dominasyon arabo muzulmano. Estudyo para azerse rabino i avlava fluentemente munchas linguas, entre eyos ebreo, arabo i latino.
Para ganar la vida, su parnasa, fue ovligado de deshar sus estudios relijyozos para ser komersante de espesyas i, finalmente, se mudo a Granada i avriyo un magazen serka del palasyo del rey. Uno de sus klientes aya era el shef sekreter del rey, Abu al-Kasim ibn al-Arif. Despues de un syerto tyempo, al-Arif empyego a Shmuel komo konsejero i, mas tadre, lo suvyo al posto de enkasador de impuestos.
Shmuel amostro su kapachidad i intelijensya en kurto tyempo i se izo un personaje muy influyente en la korte de la monarshiya. Kuando el rey muryo, Shmuel ayudo a Badis ibn Habus a tomar el trono. De su parte, Badis dyo a Shmuel el posto de grande vizir i komandante de la armada. Esto todo izo Shmuel, el Djudio de rango lo mas alto posivle de toda la Espanya. (Fue una rara eksepsyon al Pakto de Umar, ke defendiya a los no muzulmanes de okupar postos publikos).
Shmuel sirvyo komo grande vizir i primer ministro durante el resto de su vida, i okupo estos postos durante kaji mas de trenta anyos. Fue komandante militar durante disyete anyos, i su mas grande reushita en este posto se vido kuando komando su armada viktoryoza kontra las armadas kombinadas de Sevilla, Malaga i los berberes en 1047. Despues de esta viktorya, fue konosido komo Shmuel haNagid, "el Prens” o "el Governante". (En ivrit, HaNagid sinyifika Prens o Lider).
En el mizmo tyempo, fue el grande rabino i la otoridad prensipal en sujetos relatados al derecho Djudio en toda la Espanya. Fundyo una prestijyoza yeshiva ke formo a munchos grandes rabinos Sefaradis, inkluyido el padre del Rambam. Fue un prolífiko eskrivano i poeto, ke kombinava de forma unika los stiles poetikos arabos kon el ebreo bíbliko. Entre sus munchas ovras se topan un livro de teksto sovre la gramer ebrea i un manual sovre el estudio del Talmud titulado Mevo haTalmud (Introduksyon al Talmud).
Kuando muryo, su ijo Josef paso a su posto. (Trajikamente, sus enemigos selozos lo asasinaron i empesaron un pogromo ande masakraron a munchos Djudios, lo ke se yamo en la istorya el Masakro de Granada de 1066). Shmuel haNagid es konsiderado komo una figura klave de la “Edad de Oro” del Djudaizmo espanyol, el Djudio el mas influyente de la istorya espanyola, i de otra parte, komo un modelo de ko-egzistensya pasifika entre Dudios i Muzulmanes. Kfar haNagid, en Israel, tyene su nombre.
