Oy esto muy kontente porke partisipi al enkontro de alhad: la Balabaya era Karen Şarhon i la musafira Berta Penso. Estuve kontente porke so yo ke deskuvri a Berta Penso. Unas kuantas vezes ke kontaktaron a Berta, dishe a mis amigos ke puedemos azer un livro sovre las komidas de esta sivdad, de Çanakkale kon Berta. No es un livro de komidas klasiko. Es mas muncho un livro para los ke saven gizar. Eksplikando no da detalyos para una persona ke no save gizar. El segundo punto es ke Berta konose i avla el djudezmo. I es muy emportante para muestro grupo. Noche de alhad vimos en los enkontros ke Berta avla muy bien esta lingua. No se dainda si es miembro del grupo Kazika, ma deve de ser. Mizmo Sol, su kunyada . Deven de ser miembros del grupo. I reelmente no devemos eskrivir en turko. Mizmo si no semos kapaches de eskrivir en una lingua perfekta, el judeo-espanyol deve de ser muestra lingua preferada. Puedemos azer syertos yerros en empesando a eskrivir. Ma vash a ver ke muestra lingua se va perfeksyonar en poko tyempo. Kreo ke serka de 200 vezes estos enkontros fueron realizados. Oy ay dainda 60-80 miembros del grupo ke estan partisipando a estos enkontros. Malorozamente no es un shifro bastante alto para una lingua bastante rika komo el djudezmo; una lingua ke se avla en Turkiya, en Israel, en los Estados Unidos; en syertos payizes de la Amerika Latina i en syertos payizes de la Evropa. Ay munchas personas ke lavoran profesyonalmente sovre esta lingua. No kero dizir ke kada enkontro es una maraviya. Ma para dar karar devemos de segir munchos enkontros.
Esta semana en el Medio Oriente vimos muevos filmos. Vimos la muerte del kapo del grupo de Hamas, el bandido Sinvar, ke fue matado por koensidensya. Los soldados Israelyanos lo mataron sin saver ke era el famozo Sinvar. Israel reusho en su punto de vista. Ma agora el problem va ser el muevo lider del Hamas; i Israel va lavorar para matarlo. Reelmente esto todo es un problem bastante difisil. A lo manko dyes vezes eskrivi ke keremos pas en el Medyo-Oryente i en Israel. Ma esto achetando ke no es muy fasil de realizar. Kreo ke ay munchos anyos ke no me esto indo a Israel i reelmente kero ir, ma no en estas kondisiones. Devemos de achetar ke no es posivle ke este estado kontinue munchos anyos. Es pekado para el Medio Oriente; es pekado para los soldados Israelyanos i por los Israelyanos. Una vez mas va eskrivir ke kero ogurar pas en el Medio Oriente.
