Los ijos de Israel son klasados en Trivos. Eyos kampavan en las 4 vandas del Mishkan, al este Yehuda akompanyado de Issahar (Issakar) i Zevulon, esto se dize Kedem, ke kere dizir ke se va adelantre. Yehuda se topa en la kavesera del puevlo; el es reprezantante de la Monarshiya del Reynado de David el grande Rey; es un desendiente de este Trivo en el puevlo de Israel ke tyene por misyon de aplikar la otoridad del Dyo Santo i su Reynado, el Rey mete su poder al servisio de el, ke se lo dyo el Dyo Baruhu.
Kontinuaremos a avlar de los Trivos i sus misyones. İssakar estava al lado de Yehuda, el estudya i ambeza la Tora i mostra la misyon de kada Judyo de “estudyar i ambezar a otros” (Lilmud Uelamed).
Zevulon akompanya su ermano de manera materyal. Al Oeste se topa Efrayim, Menashe i Benyamin… todos los 3 desendientes de Rahel, la mujer amada de Yaakov. Efrayim i Menashe, inyetos de Yaakov, ijos de Yosef… Benyamin el mas chiko i flako, ijo ande vemos la fuersa en Mordehay (En Purim) ke no aboko nunka la kavesa delantre del kruel i potente Aman.
I en fin, en el Norte vemos los 3 Trivos de Asher, Dan i Naftali ke kere atakar presto i bueno al inimigo. Asher, el Trivo riko, sus tyerras yenas de arvoles de azituna i otros. Dan es konsiderado komo el Trivo de manka importansya ma tenyendo su misyon propriya de todo Israel.
Todos los Trivos chikos u grandes, flakos u fuertes tyenen lugar en el puevlo de Israel. Unos kompletan, uno i el otro forman el puevlo de Israel, komo el buketo de Sukot: Etrog, Lulav, Adas, Arava. El Etrog komparado al korason, tyene buena golor i savor, el Lulav tyene ermoza golor sin savor, el Arava sin golor sin savor, i el Adas (Mersin Ağacı) tyene savor i no golor.
Plantas umanas todos son presiozas delantre del Kriyador, el Dyo Santo de Israel.
No kale despresyar a denguni, kada una tenyendo su misyon chika u grande.
No mos olvidaremos de las 3 fyestas prensipales:
Pesah - Libertad.
Shavuot - Ermandad
Sukot - Igualdad
Sukot alegre keridos lektores, Pas i Amor en la umanidad entera.
