El Kriyador kreo todo el mundo, los syelos i la tyerra, i todo lo ke ay en eyos, en 6 diyas.
En el diya sejeno, kreo al ombre, Adam Arishon i a su mujer Hava. I los metyo dyentro la guerta ke kreo en el oryente, Gan Eden, para ke la lavoraran i la guadraran de no deshar entrar adyentro a las bestyas i animales.
El Dyo permetyo a Adam i su mujer de komer de todos los arvoles de fruto ke aviya en Ganeden; afuera del arvol nombrado “ETS ADAAT”, arvol de saver, ke komyendo de su fruto aze pujar los dezeos i visyos del kuerpo, le defendyo de komer de el.
Hava, la mujer de Adam, se sombayo detras de la vista ermoza de este arvol, i komyo de su fruto i izo komer de el i a su marido.
El Dyo se aravyo muncho kon eyos porke pasaron su komando i los maldícho i los desterró de Ganeden.
El Kriyador les izo azer a Adam i a su mujer unas kamizas de kuero para ke se taparan sus kuerpos ke estavan desnudos. A Adam le paryo su mujer dos ijos, Kayin i Evel. I kon kada uno de eyos paryo una ija. La ke nasyo kon Kayin se nombrava Kalamana, i fue mujer ke se okupava del lavoro de la tyerra, arar i sembrar. I Evel se okupava de pasear las ovejas.
Kayin i Evel trusheron regalos a el Dyo. Kayin trusho de los frutos de la tyerra de lo ke le vino a la mano. I Evel trusho de los primeros nasidos i los mas ermozos de sus ovejas.
El Dyo amostro su kontentes de Evel i de Kayin, su regalo no estuvo kontente. Kayin se selo muncho sovre esto i le guadro mal kerensya a su ermano.
