Todos saven ke Israel atako los Persianos noche de Shabat. Ma atako limitado. No se mesklo kon los establesimientos nukleeres, ni kon la produksiyon del petrol. Esto es un buen sinyal. Entendemos ke mizmo Israel no kere una gerra violente kon el Estado Persiano. Los Amerikanos partajan la mizma idea. Logramos de no ver una gerra terrivle en el Medio-Oriente.
Es esta fin de semana ke fue organizado por la 19en vez el famozo “Contemporary Istanbul” en el hotel Rixos Tersane (tersane era el lugar ande se fraguava vapores). Este otel se topa entre Hasköy i Kasımpaşa; uno de los mas atraktivos lugares de los anyos dalkavo. Si no savesh, muy difisil de parkar la araba. Kada anyo estan trokando la entrada de la ekspozision si el nombre es djusto. Miles de personas pagando 1250 liras (35 dolares) para pueder entrar. I miles de personas ke estan asperando. Kada anyo es mas difisil de entender lo ke esta eksposado. Este anyo organizaron tures kon gias. Este modo es mas fasil de pueder entender lo ke se esta eksposando. Es la primera vez ke estavamos vijitando este otel reelmente luksuozo kon sus restoranes i kon sus bares ande es posivle de merkar i de bever todo modo de bevyendas kon alkol. Vijitando esta eksposizion i la djente ke vienen a vijitar, me demando si ay dos Turkiyas. Reelmente tenemos dos puevlos diferentes en muestra sivdad. Una partida (no se la proporsyon) muy rikos, muy bien vistidos (markas enternasyonales), kon oras de markas i todo lo ke tyenen de menester. De la otra vanda vemos djente ke deven de mantenersen kon 20.000 liras si solo una persona lavora en una famiya. Serka de 600 dolares no se si es bastante para una famiya de 4 personas. El anyo pasado el governo pujo la ganansya minimal mas de la normal. I esto fue un problem bastante emportante para la eksportasion de muestro payiz.
Kon el Contemporary Istanbul munchas galerias de arte organizan eksposiziones de diferentes artistos. El ministeryo de la Kultura kon la Munisipalidad d’Estanbol estan azyendo kompetisyon para realizar aktividades artistikas en muestra sivdad. Reelmente ke mazal!
Kero terminar partajando kon vozotros lo ke bivi esta fin de semana. Un grupo de la Notre Dame de Sion de Fransia i de Estanbol organizaron un tur de kultura. I alhad vinyeron al Muzeo Djudio, i por la primera vez tuve la posibilidad de azer vijitar un grupo de 30 personas eksplikando munchas kozas en fransez. I reelmente estava muy emosyonado de bivir esta eksperyensya.
