Antes unos kuantos mezes se topo en el dezyerto de Yehuda una piesa de paras datando del tyempo de la Revolta Judiya kontra los Romanos. Esta para es muy rara i data de los anyos 66-70 antes la Sefira. Los Arkeologos la toparon a la entrada de la grota serka de Engedi. Eya tyene la valor de medyo shekel. En el dezyerto de Yehuda ay munchas grotas (maara) i los arkeologos izyeron 6 anyos de estudyos en mas de 800 maarot en el dezyerto. La para es de plata, en una facha se ve eskrituras en ivrit antiguo ke dize Yerushalayim A Kedosha (Yerushalayim la Santa). En la mizma facha vemos 3 agranadas ke fueron el sembol de la para (lira) israelyana, ke se empleyo asta 1980. En la otra facha se ve una kupa ande esta eskrito la letra Alef, ke kijo dizir ke esta para datava del primer anyo de la Revolta kontra los Romanos. En la segunda facha se ve eskrito Medyo Shekel. La Kupa era el sinyo ke se viya enriva las paras en la epoka del Beth Amigdash. Los miembros de la revolta aviyan echo piesas de plata i bronzo ke se topo del anyo 66 de la Sefira. Los Arkeologos pensan ke se izyeron en Yerushalayim en el tyempo del Beth Amigdash. De mezmo se pensa ke esta piesa kayo de la aldikera de uno ke se estava fuyendo de Yerushalayim, de la Revolta, en el dezyerto por el kamino de Engedi.
En el tyempo de los primeros anyos se enpleyava, se eskriviya un ivrit sin vokales, ande se yama (La eskritura sin bozes) a e i o u ke se yama (Ketiv Haser) Ma los anyos sigientes todo se eskriviya komo el ivrit de oy ke se yama (Ketiv Male).
La Revolta kontra los Romanos tomo fin kon la destruksyon del sigundo Bet Amigdash en los anyos 70 A.J. Kuantos trezoros istorikos se topara en siertas grotas de la Tierra Santa ke mos kontan muestros pasados.
