El maestro moderno de los kuentos populares judios, el narrador, Eric A. Kimmel, esta amostrando ke en Sukot es importante resivir invitados i tambien esta aksentuando la importansia de la ospitalidad.
Era la sezon de Sukkot, la fiesta judia de la rekolta. Los ermanos Eben i Ezra tienen diferentes karakteres. Ezra es jenerozo, Eben es egoisto. Los dos ermanos konstruyen kada uno una suka, o refujio, para selebrar la fiesta i partajar los donos de la tierra kon los invitados. Eden es muy riko; Ezra es muy prove. Ezra, ke tiene poka moneda para gastar, konstruye kon amor su suka kon tavlas viejas, sovrajes de komida i fruta demaziya echas. Todos son bienvenidos i estan kantando kantikas alegres. La suka de Eben esta orgulyoza i glorioza yena de las mijores kozas ke la moneda puede merkar. Ma solo los rikos estan komiendo en la suka de Eben.
Una noche, Abraham, Ishak i Yaakov abasharon del sielo al mundo para ampesar sus vijitas de sukot de kada anyo. Ezra los resivio en la suka i los invito a partajar la poka komida ke teniya. En la suka de Eben, los invitados estavan eskapando sus komidas. Eden les disho a los misteriozos envitados de asperar en el kanton, i ke les va ofreser lo ke kedo.
Kuando los misteriozos envitados se estan indo, deshan detras una bendision para kada ermano ke konforme kon la resepsion ke les dieron. Le dan a Ezra una bendision espesial ke rekonosieron la jenerozidad del korason i lo bendizen, ma no azen lo mizmo a su ermano riko porke Eben es egoisto. Los tres patriarkes bíblikos rekompansaron la persona jeneroza i el egoisto tomo una leson por modo de su negro komporto.
Bazandose en la tradision de muestros antepasados ke son envitados a la suka kada anyo, Kimmel mos dio el poderozo mesaje ke no es el ermozo eksterior, ma es la jenerozidad sensera ke traye bendisiones de buendad a la kaza.
Sukot es una fiesta judia de una semana ke selebra la rekolta de otonyo. Es una de las fiestas las mas alegres del judaizmo, destinada a unir las famiyas, los amigos i las komunidades. Los judios komen, durmen i pasan tiempo en la suka. Un elemento emportante de la definision de la suka es ke su techo proteja del sol ma no detiene la luvia. Da refujio, ma no proteja kontra los elementos. Esta kuliba ke no es ekilibrada, kon su techo de paja, transmete el mesaje esansiel de la fiesta. La suka sierve komo un avizo al ombre para ke no se konfiye demaziya a la rikeza.
