Kada vez vos konto los lugares ke kamino en el mundo. Los paizes i sivdades. Oy kije kontarvos los savores ke me kedaron en la boka en las sivdades ke kamini. Por egzempiyo en Frankfurt en un restorante la salata de patatas ke me trusheron. Estava una salata muy savroza. Kon Shnitzel de gayna, kon pishkado frito komo Mezgit, kon kyoftikas fritas i kon Sosis Frankfurter, ke es spesyal de los Almanes se va muy ermozo. A mozotoros mo la trusheron allado del shnitzel. El restorante era en Römer, ke es en la sivdad vieja de Frankfurt. Vos dare la resefta de la salata de patata ke komi en este restorante. Este karar me plazyo ke oy en diya en kaza lo aparejo yo.
3 o 4 patatas se kortan en pedasikos grandes, komo se dize en turko revanadas de mansana. I se echa aryento de la agua ke esta buyendo kon sal. De otra parte se apareja sevoya kolorada partida komo piyaz, pirishil kortado muy fino, trushi de kornishon kortado chiko. Por la sos se toma una kuchara de supa de mayonez, una kuchara de mustarda dulse, dos kucharas de supa de vinagre, medyo limon, 4 kucharas de azete de oliva. Todo esto vash a echar aryento de un bol i vash a karishtereyar. Despues ke se metyo en un chini ondo las patatas, en primero se mete ensima la sevoya, el pirishil i el trushi i en ensima se echa la sos ke se aparejo i se da unas kuantas bueltas. Si keresh puedesh meter ensima ravanikos kolorados para dar un dekor ermozo. Si vos plazyo este resefta vos konto otra vez lo ke komi en las sivdades diferentes i ke me kedo la savor en la boka.
