El kal Hurva, en ebreo, Beit Ha Knesset ha Hurva ke kere dizir “el kal de las ruinas”, tanbien konosido komo Hurvat Rabi Yehuda ha Hasid ke kere dizir “Ruina del Rabino Yehuda el Piadoso”, es una kongregasyon i sinagoga judiya ortodoksa, ke se topa en la rejiyon judiya de la sivdad viyeja de Yerushalayim.
Este kal fue fundada en el empesijo del siglo XVIII por los dishiplos de Yehuda Ha Hasid sovre las ruinas de una sinagoga del siglo XV al lado de la meshkita Sidna Omar, ma fue destruida unos anyos mas despues en 1721 por las otoridades Otomanas, porke sus proprietarios no aviyan pagado una devda a los muzulmanes lokales. El tereno, ke fue yamado Hurva (ruina), kedo ansina durante 116 anyos asta ke los miembros de la komunita judiya ashkenazi, konosidos komo Perushim, (los adeptos de Vilna Gaon) en 1864 konstruyeron la sinagoga de muevo. Malgrado ke le metyeron el nombre “Sinagoga Beit Yaakov”, mantuvo su nombre komo Hurva. Se izo el kal de los ashkenazis en Yerushalayim, asta ke fue de muevo destruida por la Lejyon Araba, durante los kombates de la gerra arabo-israeli.
Despues ke se tomo el este de Yerushalayim de Jordania en 1967, se prezentaron munchos planos para la mueva konstruksyon. Despues de anyos de indesizyon, desidaron de fraguar un arko en su lugar, ke se izo un lugar de komemorasyon en el kartie judio. En el anyo 2000, el plano de rekonstruksyon fue akseptado por el governo Israeliano i el muevo kal rekonstruizado se inauguro el 15 Marso de 2010. En fraguandolo toparon i tres mikves, kavakados aryento de una piedra grande datada del 1. Siglo.
En el anyo 1700, vinieron de Polonya 500 ashkenazis. Sus lider era Yudah Hahasid. Se enstalaron en Yerushalayim i ampesaron a bivir una vida solitaria para asperar la vinida del Mashiah. Despues de kurto tiempo sus lider muryo i el grupo se disperso. Los ke kedaron kijeron fraguarsen un kal. Ma kon tiempo se les eskapo las paras i tomaron emprestado de los muzulmanos del doredor. Kuando no pudieron mas pagar la devda, los arabos kemaron el kal i arondjaron todos los ashkenazis de aya.
En 1808 vino otro grupo de Litvanya yamados Perushim. I eyos eran muy solitarios. Sus lider era Vilna Gaon. Eyos se enstalaron en Tsfat. Unos de eyos kijeron enstalarsen en Yerushalayim i tomar el lugar de la koloniya ashkenazi atras. Por esto unos de los lideres komo Solomon Pach i Avraham Zalman, se fueron a Kostantinopolis a tomar permisyon i ferman del Sultan. El Sultan ya les aksepto sus demandas i efaso todas sus devdas. Ampesaron de muevo la fragua en el model i kontrol del arshitekto ofisial del sultan, Esad Efendi. El Ehal teniya kapasita de kontener 50 Sefer Toras. Las puertas eran dekoradas kon figuras de flores i pasharos, ke eran trayidas del kal Nikolayevski de la Rusiya por los soldados judios rusos. Ay tanbien kuatro animales ke se estan mensionado en Pirkei Avot ke dize: “Sé fuerte komo el leopardo, rapido komo el agila, livyano komo el siervo i korajozo komo el leon para azer la voluntad de tu Padre en los sielos”.
En el anyo 2000, el governo Israelyano dyo permisyon ke se frague este kal, a su forma orijinala en el formato Otoman. El arshitekto de Yerushalayim, Nahum Meltzer tomo este proyekto.
La Hurva rekonstruida se inauguro ofisialmente el 15 Marso de 2010, en prezensya de politikos i rabinos prinsipales israelis.
