Estos son las jenerasyones de Noah. Noah, varon djusto, prinismo fue en sus jenerasyones. Kon el Dyo kamino Noah. La perasha de Noah nos enbeza ke en la epoka ke bivyo Noah, toda la djente eran malos i no buenos. Solamente Noah fue una persona djusta i buena, ke kamino en kamino del Kriyador. Shelomo Ameleh dize: bien aventurados son los ijos de los tsadikim, de las personas djustas.
El tsadik verdadero, todas las echas ke el aze los aze al nombre del Kriyador. I no por mostrar a la djente o por komprar grandeza, dizyendo yo so patron de tsedaka. Yo ago syempre bienfezensyas. El Kriyador aborese a la djente ke todo lo azen por grandeza. El menestorozo ke toma ayudo de personas semejantes se enrejistran i no pueden salir delantre la djente. Djente ke son patron de grandeza kavzan rejistro al menestorozo ke tomo ayudo de el por kavza ke lo konta a la djente i de mas ke la grandeza es una manya muy feya. Vyendo a la perasha ke nos konta ke Noah fue una persona djusta, i prinismo ke andava en kamino del Dyo. Noah todo lo ke aziya lo aziya kon djustedad i era kumplido en su korason, ke su korason era atado kon El Kriyador. En el primer verseto de la perasha el nombre Noah esta repetado tres vezes: “Estos son las jenerasyones de Noah. Noah era persona djusta. Noah andava en el kamino del Kriyador.” Esto sinyifika ke Noah vido el estado bueno del mundo, las sivdades, las kalejas, i las plasas, un mundo manyifiko. Despues vido la destruisyon del mundo, por kavza del deluvyo ke trusho el Kriyador. I el Kriyador le amostro despues del deluvyo ke renuvelo el mundo. Dizen muestros savyos ke Noah fue ombre djusto en un tyempo ke toda la djente eran negros i malos. Si el biviya en la epoka ke bivyo Avraam Avinu, no iva ser tan konsiderado. Ma ay dizyentes ke entre tanta djente non buenas, ser djusta amostra ke era fuerte en sus sintimyentos.
Noah, en azyendo la arka ke le enkomendo el Kriyador estava doktrinando a la djente ke tornaran en teshuva, ke se arepintyeran de la malisya si no ke el Kriyador iva destruir el mundo, ma no fue sintido.
