Segun un muevo estudio jenetiko realizado por sientifikos espanyoles, el famozo eksplorador Kristof Kolomb era espanyol i judio. Los sientifikos estan kreendo ke el eksplorador, en su ekspedision en la Atlantika en 1492, troko el kurso de la istoria mundial.
Kolomb probablamente nasio en la Evropa oksidental, en la sivdad de Valensia. Para guadrar su identidad judia, se konvertio al katolisizmo, para fuyir de la persekusion relijioza. El estudio del DNA, esta kontradiziendo la teoria tradisional, ke munchos istorianos aviyan kestionado, ke el eksplorador era un italiano de Djenova. Kolomb dirijo una ekspedision apoyada por los Reyes Katolikos de Espanya ke kerian estableser una mueva ruta a Asia, ma Kolomb en lugar de esto, arivo a las izlas Karaibes. Esto fue un periodo de kontakto evropeo kon la Amerika, ke iva avrir el kamino a la konkuesta, a la instalasion, i a la muerte de munchos miliones de indianos por modo de hazinuras i de gerras.
Por munchos anyos, los paizes diskutieron sovre el orijin del eksplorador, i munchos lo konsideraron komo uno de eyos. Se estima ke egziste 25 teorias sovre su lugar de nasimiento, komo Polonya, Grande Bretanya, Gresia, Portugal, Hungria i Eskandinavia. Estos muevos deskuvrimientos se bazan en mas de dos dekadas de investigasion.
El estudio empeso en 2003, kuando José Antonio Lorente, profesor kuridiko de medisina de la Universidad de Granada, i el istoriano Marcial Castro, kitaron de la tomba lo ke kreeron ke eran los restos de Kolomb en la Katedral de Sevilla.
Kolomb murio en la sivdad espanyola de Valladolid en 1506, ma kijo ser enterrado en la izla karaibe de La Espanyola. Sus restos fueron yevados aya en 1542, ma siglos despues fueron transferados a Kuba antes de ser enterrados finalmente en Sevilla. Los investigadores tambien tomaron el DNA de la tomba i de los guesos del ijo de Kolomb, Hernando, i de su ermano, Diego.
Los sientifikos kompararon esta enformasion jenetika kon la enformasion tomada de los parientes del eksplorador para rezolver el misterio. La teoria la mas akseptada fin agora era ke Kolomb nasio en Djenova en 1451, en una famiya de teshedores de lana. Ma agora, se estan kreendo ke bivio en Espanya, probablamente en Valensia, i ke era judio. Kolomb guadro su orijin para evitar la persekusion.
Alrededor de 300.000 judios bivian en Espanya, antes ke, endjuntos kon los muzulmanes, fueron ovligados a konvertirsen al katolisizmo o abandonar el paiz en 1492, el anyo ke Kolomb dezembarko en Amerika.
En anonsando los rezultados del estudio en el dokumentario de televizion, el profesor Lorente disho ke su verdadero orijin era seguro. El program ke se emitio en la kadena nasional espanyola RTVE noche de Shabat, koinsido kon el Dia Nasional de Espanya. Este dia selebra la yegada del eksplorador a Amerika.
