En entrando en el primer kapitulo del livro de Yeushua, konosemos el kontinuador de muestro grande Moshe. Siertos kritikos pensan ke ay dos Yeushuas, en realidad son las dos personalidades de este grande profeta ke komporta de un Yeushua ke no sale de su tenta de estudyo, i un konkistador de la tierra de Israel. Moshe resivyo la Tora en el Sinay i la transmetyo a Yeushua, i la segunda reprezentasion de este profeta es el kombatante ke abatyo las paredes de Yeriho, i izo entrar a su puevlo en la tierra de sus avuelos. Si en primero vemos un Yeushua kon barva blanka, ke dyo su vida al estudyo de la Tora, vemos un Yeushua militaryo konkistador de la Tierra Santa, i mas tadre un lavorador, ensebrando i arufyando la tierra komo un simple kultivador. La Tora no fue eskrita por el pasado ma para amostrar el avenir, komo lo ordeno Moshe a su dishiplo Yeushua, “Kale ke estes fuerte, sin dingun espanto es tu ke vas a tener esta misyon, no te aleshes ni de la siedra ni de la derecha de la Ley de Moshe, para ke reushkas en este kamino tan duro i perikolozo.”
Sukot ya paso, Fyesta alegra yena de mesajes. Mos asentimos en la Suka, en el Makif (serklo) de igualdad, amor i en segurita komo un ninyo en la tripa de su madre… Akel tyempo se realizara la profetiya del profeto, Yeushua “Va vinir tyempo, la Montanya de Siyon se va afirmar enriva de otras i los otros puevlos diran… "Vini suveremos verso la Montanya Santa del Dyo de Yaakov, ke mos ambeze su Ley… Porke de Siyon saldra la Tora, i de Yerushalayim la palavra del Sinyor del mundo. Amen.
En la Suka mos asentaremos
I endjuntos bendizeremos
Pas i amor suetaremos
Ke mas madres no yoren
I dingun ijo se bole.
Invyernada buena tendremos
Sin sar ni mal biveremos.
