La ketuba es un dokumento muy emportante en la tradisyon djudiya i reprezenta el kontrato de kazamiento. La palavra “ketuba” kere dizir “eskrivido” en ebreo. Este kontrato es eskrivido por el novio para asigurar los derechos de la novia durante el kazamiento. I siguro mas despues, ke no ayga, para asigurar los derechos de la novia en kavzo de divorso.
Tradisyonalmente la ketuba se afirma en la boda i se guadra en la kaza del par kazado. Ma muestros grandes diziyan ke no es bueno tener la ketuba en kaza porke sale pleto. Por esto se da a un serkano de la famiya de la novya. En la kultura judiya la ketuba tiene una valor tanto relijioza komo legal. Mos endika los derechos, los doveres i las obligasyones finansieras del par.
La istorya de la ketuba remonta a munchos anyos atras i es dizenyado a baze de las reglas de la ley de kazamiento en el talmud. En este dokumento, el novio aze una promesa de sostener finansialmente a su espoza i spesifika lo ke se deve dar en kavza de fin de kazamiento. Por egzemplo, la ketuba tiene detalyos komo el marido deve de mantener a su espoza i asigurar sus nesesidades. En kavzo de divorsio o de la muerte del marido, la ketuba pensa a protejar la seguridad finansiala de la mujer.
Las ketubas tradisyonalas tienen dekorasyones artistikos i kada kultura tiene sus estilografias unikas. En munchos kavzos son eskritos en ebreo, ama tanbien se pueden ver en la lingua lokala o en la lingua ke el par avla. Oy en diya, las ketubas son populares entre los pares djudiyos i refletan no solamente las valores tradisyonales sino tanbien los penserios modernos. Estos dokumentos forman una parte importante de la seremoniya relijiyoza i sembolizan las santedad del kazamiento djudiyo.
Bien guadrado i mal topado dize un proverbo djudio. Estas ketubas son muy valorozas. Se guadran tanto bien ke a la fin se peryen. Se guadran ande un paryente onoravle. Komo kuando me kazi, el rav Haribi Baruh dyo la ketuba a mi mama i mi mama se la dyo a mi tant Sara para ke la guadre. Mi tant Sara ay puedeser 40 anyos ke mos desho la buena vida, i muestra ketuba se peryo siguro. Yo meldi en otra ketuba ke dize “Yo … ijo de … prometo ke la va mirar a mi mujer, la va vistir i artar. I en kavzo de divorso le va dar … oros.” Digo ke si la ketuba se peryo, nada de estas promesas son valavles. En la Turkiya dainda tenemos ketubas tradisyonalas ma en otros payizes ay muy diferentes ketubas kon kolores, flores, pasharos. Ma lo ke no troka es un Pirke Avot en el titolo.
En el Muzeo de los Djudios Turkos van a ser ekspozadas despues del 7 Noviembre, komo 50 ketubas rekopiadas de varios koleksyonistos. El Gran Rabino, Isak Haleva i Ceri Benardete i el archivo del Muzeo de Israel, van a ekspozar estas ketubas, debasho del sponsor del Konsulato Amerikano. Tanbien se ekspozara ketubas de las komunidades askenazi, karaita i irani.
