Me akodro 40 anyos antes me iva irme a Milano. Mi primo me disho, saves, aya komi en un restorante i despues de komer me trusheron un savor de boka ke estava maraviyozo. I tu kale ke lo gostes. Se yama TIRAMISU. Este gató en los anyos 1985 dainda no se konosiya en Estanbol. Tomi el nombre del restorante ke era Charleston. Piazza de Liberty, 8 detras de la katedral Duomo. Una noche me fui. En primero tomi una Pizza de 4 kezos kon un vaziko de vino kolorado. Despues de komer, le enkomendi el Tiramisu al garson. De verdad estava muy ermozo. Kaji ke me iva komer i los dedos de la savrozor. Despues de unos kuantos anyos se konosyo en Estanbol este gató.
Me kontaron al istorya de Tiramisu.
Un shef de dulsuryas i gatós ke se yamava "Carminantonio Lannaccone" viene a Milano en los anyos 1970 -1980 para lavorar. Avre un Ristorante kon el nombre "Piedigrotta" i empesa a pensar azer un gató diferente. Empeso a lavorar i en fin izo un gató komo la resefta de abasho. Le metyo el nombre Tirami Su. Kijo dizir en Italyano “Travame ariva”.
Vos dare la resefta si keresh de este gató savrozo.
Materiales
2 kupas de agua no yelada i no muy kayente.
3 kucharas de dulse de kafe granulado
1 kuchara de supa de asukar
1 paketo de bizkocho ke se yama aluenga de gáto
Para ensima
1 kuchara de supa de kafe
Para azer la krema de ensima
200gr de kezo spesyal, Maskarpone; si no topash puedesh uzar Labne
3 blankos de guevo
Medya kupa de agua de asukar
1 paketo de 75 gr de krem shantiyi
En primero se apareja la krema.
La asukar kon los blankos de los guevos se chafteyan kon mikser i aryento de esto se mete la asukar, el kezo Maskarpone o si no el Labne i la krem shantiyi.
Aryento de la agua se mete el kafe granulado, la asukar, los bizkochos se untan a esta agua i se meten al chini; una sira ensima se mete la krema ke se aparejo, despues otruna sira de bizkochos mojados, despues la krema i ensima se mete el kafe en polvo. Despues se mete al frijider kaji una ora i despues se puede komer. Al lado kon un kafe Espresso se va muy bueno.
