El agrikultor Oz Davidian risko su vida para salvar los partisipantes del festival Nova, indo i viniendo 15 vezes al lugar del festival i yevarlos a un lugar seguro. “Mi solo arrepentimyento es no pueder salvar mas munchas personas" esta diziendo Davidian. “Komo bivimos en el sur, ya mos ambezimos a konoser los tipos de misiles i este fue un atako inuzual”.
Oz mora a sinko minutos del lugar del festival Nova. Kuando resivio un mesaj de WhatsApp para ayudar a los firidos, Oz disho a su famiya ke se esta indo, salio de su kaza i vido djente korriendo. Los yevo a un lugar seguro i empeso a konduizar en las kalejikas. Los teroristos estavan konduizando en las kalejas prinsipales. Empeso a salvar a los mansevos ke rankotro en el kamino. Los ke se salvaron empesaron a dar haber a sus amigos. Oz se fue direktamente a sus lugares. Oz les demando de eskrivir sus nombres en un papel. Mas duspues esta lista se konvertio a ‘La lista de Oz’. Esta lista pujo i pujo i se izo 120 personas.
Mas duspues, Oz disho ke era un miraklo de pueder salvar este karar de mansevos. Los teroristos munchas vezes lo vieron i tiraron enriva de el ma el Dio lo salvo. ‘Me rendi kuenta ke si no kontinuava, munchos de estos mansevos se ivan a murir. No so relijiozo ma kreo en Dio. Los mansevos estavan seguros ke so uno de Mossad. No, les dishe so un simple judio ke vino a ayudar. Kada vez ke Oz los konduizava a un lugar seguro, les diziya: “No miresh a la siedra, ni a la derecha. No keriya ke veygan las kadavras. Estava mirando a kalmarlos, les di sigaros para ayudarles a relaksarsen".
Aviya sienes de kadavras i otros kemados por todas las partes. No aviya nada para protejar a estos mansevos. No es posivle de ver este modo de oror mezmo en los filmos. Oz vido un oto de polisia israeliana djusto al lado. Penso puede ser ke es un mediko judio ayudando a los ferridos. Oz les disho: ‘Ay munchos ferridos ke tienen menester de ayuda’. Kuando el ombre le respondio en arabo, Oz entendio ke no es un mediko ma ke es un teroristo. Oz akselero la kamioneta i se alesho de aya.
Oz bushko en los kampos sinyales de vida. Vido kadavras esparesidas por todas las partes. Fin la noche, estuvo indo i viniendo al lugar del festival. ‘Estava pensando solo a salvar mas munchos mansevos. Oz esta diziendo ke kada mansevo ke el salvo, agora es su ijo. ‘Son komo mis proprios ijos. Los kontrolo si estan buenos. Tenemos un grupo en WhatsApp i esto en kontakto kon todos. Mos reunimos de vezes en kuando.
El 30 de oktobre, Oz resivio un sertifikado de onor del Estado de Israel. Munchos de los sovrebivientes asistieron a la seremonia. Los partisipantes de Nova estan diziendo: “El es muestro anjelo". Oz, no pudo salvar a todos ke bushkaron su ayuda. “Ay madres ke me embiaron a bushkar a sus ijos. Ma kuando arivi a sus lugares, sus ijos estavan muertos. Esto me aze grande pena”.
Rekuperarse de su trauma fue muy difísil. Oz se va a la terapia kon los mansevos ke salvo.
"El puevlo judio bive i se muere unos por otros, esto es muestra fuersa, nada no mos puede venser" esta diziendo Oz.
