En el empisijo del anyo tuve el plazer de vijitar la grande sinagoga famoza “DOHANY” en Budapesht. La mas grande sinagoga de la Evropa, i la sinkena grande sinagoga del mundo ke tyene 3.000 asyentos.
Este templo se konstruizo entre los anyos 1850-1854 en el stilo morisko, i fue dekorado en jeneral kon motivos islamikos del norte de Afrika i de la Espanya medieval. Este templo es el sentro del djudaismo neologo.
Asigun la kreensya del arkitekto, Vienes Ludwig Förster, en este sentro del djudaismo neologo, no egziste un estilo arkitektoniko spesifiko de los djudyos.
Por esta razon es ke, se utilizo el stilo de las etnias oryantales, paryentes de los israelitos, spesyalamente los arabos.
Puedemos ver aki, ke ay motivos diferentes de las tres relijyones. Esto kere dizir ke todos los umanos pueden bivir endjuntos en el mundo entero porke son mismos.
En este templo, se topa la “Grande Sinagoga Dohany”, el templo de los eroes i en el lugar de la kaza ande nasyo Theodor Herzl, ay un muzeo djudyo.
La kaye Dohany, kuvyerta de ojas en el sentro de la sivdad, evoka fuertamente el Olokosto, porke al tyempo era la frontyera del ghetto de Budapesht.
La primera orasyon se realizo aki en el anyo 1859. Fue bombardeado en el anyo 1939 i en la sigunda gerra mondyal se utilizo komo ahir. Este edifisyo fue danyado en la sigunda gerra mondyal, ma el mas grande danyo se produizo en la gerra de Budapesht.
En el tyempo del komunizmo, este edifisyo fue de muevo la kaza de orasyon para la komunita djudiya ke se estava diminuando presto.
En el anyo 1991, empesaron a restorarlo i en el anyo 1998 se termino. La restorasyon fue finansada kon la ayuda guvernamantal i donasyones privadas.
La altura del edifisyo es 75 m., la anchor 27 metros. La sinagoga konstruida en el stilo morisko, tambyen kontyene elementos gotikos i romantikos bizantinos.
Dos kupulas en forma de sevoya estan asentadas sovre torres buchukas oktagonales de 43 metros. Enriva de la puerta de entrada ay un vitray de kolor roz. En el arko se topan las sefer Toras de las sinagogas destruidas en el Olokosto.
La sinagoga del sentro de Newyork Manhattan es djusto la mizma de la sinagoga Dohany. El arko de la Tora i los freskos internos kon formas jeometrikas koloreadas kon oro, es la ovra del arkitekto hungaro, Frigyes Feszl.
Las siyas de baza son para los ombres, las siyas de la seksyon del balkon sostenidas kon kolonas de fyerro son para las mujeres.
Las restorasyones empesaron en los anyos 1990 kon la demokrasiya ke vino atras a la Ungaria. El program de rekonstruksyon de tres anyos, se realizo kon la donasyon de sinko milyones de dolares ke izo Estée Lauder, ke era una émigrante djudiya de la Ungaria.
El muzeo djudyo se topa allado de la sinagoga Dohany, en la kaza klasika de dos etajes de Théodor Herzl”. En el muzeo, se topan munchos objetos relijyozos, fotografiyas i una kamareta del Olokosto.
El templo de los eroes se utiliza kon sus 250 siyas en invyerno, en las orasyones de entre la semana, porke kayentar la grande sinagoga de 3.000 personas en invyerno es muy difisil.
El simeteryo djudyo se topa detras del templo de los eroes i es anturado del muzeo i de la sinagoga. En el anyo 1944, la kaleja de la sinagoga Dohany azia parte del ghetto de los djudyos ke sirvyo de refujyo a munchas personas.
En los invyernos de los anyos 1944-45, mas de doz mil personas ke muryeron de ambre i del friyo fueron enterrados en el kortijo de la sinagoga.
400.000 djudyos ungaros fueron asasinados por los nazis. El monumento parese a un arvole ke esta yorando i en kada oja aparese los nombres de las viktimas.
