En estas semanas de ospital en las largas oras de soledad, rekordos de mi chikes me vienen al tino i pasan delantre los ojos komo un filmo de kolor.
Mi padre (ke su alma repoze en Ganeden) era de Tekirdağ de ande salyo muy manseviko, para estudyar en Salonika. Teniya un ermano grande ke era vendedor de granos ke kedo en Tekirdağ. El onkle Jak teniya manya de mandar kada erev de Pesah i otras okazyones, produktos komo (Bulama) ke era echa de sumo de uva, guevos freskos i mas otras kozas savrozas. Un anyo no se lo ke le paso en el tino, mos mando 3 gayinas i un gayo… El mesajero teniya uzo de deshar los paketos en el Hol de la Banka i irse… Kuando dyeron haber a mi padre ke venga a tomarlos, se topa delantre de 3 gayinas i el gayo atados unos a los otros kon un espango. Vos imajinash su enkanto no savyendo kualo azer. Se topo persona i se mandaron a kaza. Mi madre los arisivyo kon enkanto, imajinavos yo kriyatura, lo tomi en primero por djugete, dandoles a komer i pasando mi tyempo delantre las gayinas i el gayo, ke incheron el mupak i ensuzyando i gritando kon bozes altas. Ma kuando oyi diskusyon kon un Shohet para degoyarlas a la demanyana, ampesi a yorar i gritar ke son todos kriminales, i ke mos van a yevar al prezo… estas eran miyas i yo las iva mirar… Siguro ke ya se esta vyendo la tristeza de sus miradas, sovre todo una kon su ojo de akuzasion… Noche entera me alevanti en silensio, avlandoles i prometyendo de salvarlas del kuchiyo, fasta la demanyanika kuando el gayo echo su kokoriko… Me kitaron de kaza, me kontaron konsejas, avlaron mentiras… La kaza se incho de plumas, la golor vos desho a imajinar… Se yamo persona a boyadeyar el mupak… Esta aventura se konto diyas, ma en mi korason de kriyatura kedo esta ravya por mezes i tanbien el disgusto de komer gayina. Fue la unika vez de este modo de regalo… Oy me akodro kon nostaljia i eskarinyo, de los rikordos del pasado ke inchen mis oras, de sintimyentos dulses i amargos. Miles de rekordos ke puedran ser livro de konsejikas.
Los viejos biven en el pasado, i sus memoryas komo un livro yeno de kolores i amor.
