Jueves a la tadre tuvimos la okazion de la avyertura de la ekspozision de las Ketubas Otomanas i Turkas. Esta ekspozision fue realizada por el muzeo Djudio de Turkiya. Yo fui el kurator, i Nisya Allovi, Emel Benbasat, Dalia Sayah, Alberto Modiano i Semih Alalu fueron los ke mos ayudaron para la realizasion. No fue muy kolay de realizar esta ekspozision. En primera kaliya topar las ketubas antiguas ke no fueron printadas en las imprimerias. Las ke eran en primero pintadas por syertos artistos i dospues eskritas kon letras de solitreo en la lingua aramea por los hahames. Syertas de estas ketubas son reelmente ovras artistikas. I reushimos a arrekojer mas de trenta deyas en este djenero. Pudimos topar al koleksyonaryo Ceri Benardete ke tenia mas de 20 ketubas en su kaza. Las sinko eran Otomanas i merkadas en las vendidades en diferentes sivdades de la Evropa. Solo kuatro de las ketubas ekspozadas no eran verdaderas. Tomimos el derecho del “Israel Museum” pagando lo ke demandaron i las imprimimos en un studio famozo.
Dospues ke topimos las ketubas, syertas fueron konservadas por una profesional ke save su echo. Syertas estavan yenaa de bandas apegadozas. Todo fue kitado. I antes de enkuadrar las ketubas empleyimos un papel sin asido para ke esten sanas i rezias durante munchos anyos. Mizmo deviyamos de enderechar las ketubas ke kedaron dubladas anyos i anyos. Ken save meldar estas ketubas? Malorozamente tenemos solo unas kuantas personas ke saven meldar estas ketubas. No son muy mansevos. Ma es el Sinyor Yusuf Altıntaş ke mos ayudo para meldarlas. Dospues es el Rav Mendy ke mos ayudo para las ketubas printadas. El diya de la avyertura un rav mansevo ke es el ayudante del hahambashi de Tunisia ke organizo un sistem en el internet para 3200 ketubas tunisianas sin dinguna pintura, ma todas eskritas en solitreo. I era kapache de meldarlas komo yo meldo en Turko. Vamos a publikar un livro sovre esta ekspozision. I es el famoso fotografo, İzzet Keribar ke va fotografiar estas ketubas.
Buen karar de djente vinyeron diya de jueves. Ma esta ekspozision va estar avyerta en el Sschneidertempel asta el 17 de Novembre i empesando el 20 Novembre lo vamos a transferar al muzeo Djudio, al lado del Neve Şalom para los ke no konosen dainda el lugar del muzeo.
I diya de alhad en el Schneidertempel avia el diya de la sinyatura del livro de Rakel Meshulam. Un livro sovre el famozo karikaturisto, İzel Rozental ke es una teza de doktorado. Durante este diya, İvo Molinas i İzel Rozental toparon de avlar unos kuantos biervos sovre Rakel i su livro.
