En el anyo 1933, kon la propozisyon del direktor jeneral del UNESCO, Federico Mayor, el sinko de Oktobre fue akseptado komo Diya de Maestras en el mundo entero. Ma agora, en munchos paizes, este diya se esta selebrando en diferentes datas. En la Turkiya, kon la propozisyon de Atatürk, el ventikuatro de Novembre fue fiksado komo Diya de las Maestras.
En este diya, el mas ermozo mesaje ke una maestra kere resivir es: ‘Estamos apresiando tus eforsos!’. Ma malorozamente, en dingun lugar en el mundo, este mesaje no se esta repetando muncho.
El objekto del Diya de Maestras es de stimular i prevenir los governos i el puevlo, por la nesesidad de developar las kondisyones de lavoro de las maestras i de elevar sus status en la sosiedad. Las maestras estan aziendo munchos eforsos para aparejar una jenerasyon pronta a los trokamientos rapidos de la vida de oy.
Segun el grande edukador Dr. Sarvapelli Radharkrishnan, ‘Las maestras deven de ser los mijores meoyos de un paiz, porke eyas son las ke dan la formasyon a las kreaturas i a los mansevos’.
Si pensamos ke un elevo pasa los tres kuartos de un diya en la eskola, puedemos entender ke karar de grande es el efekto de la eskola i de las maestras en su developamiento. Los mas emportantes modeles en la vida de los elevos son las maestras.
El dover de una maestra no es solo de ensenyar, ma es tambien formar la vida de los mansevos kon grandes objektivos i esperansas. Edukar es espander los orizones de los mansevos, mobilizar sus intelekto i ensenyarles a pensar djusto. En edukando, una maestra aze munchas kozas en mezmo tiempo. Ensenya, orienta, inspira, ayuda al progreso akademiko, sosyal i emosyonal de sus elevos. En azyendo ganar a sus elevos buenas kalidades, una maestra pena para ke sus elevos se apersivan de sus talentos i ansi, ke ganen sus propia konfiensia. Determinar objektos en la vida, krear muevas kozas, ser reushido i lo mas emportante, ambezarles a gerrear kon los problemes ke van a rankontrar en la vida, son tambien los doveres de una maestra. En kurto, una maestra ayuda sus elevos, a ser armados para pueder avrir las puertas de una mijor vida. Kada diya, los edukadores estan bushkando muevas teknikas para pueder arivar a este objektivo de la mijor manera.
Oy, las personas deven ambezarsen muevas kozas kada diya i de developar sus talentos para pueder alkansar a los trokamientos kontinuales de la teknolojiya. En los anyos dalkavo, la edukasyon i la siensia trokaron de sinyifikasyon. Antes, ambezar era solo en las eskolas; oy, ambezar esta kontinuando durante la vida entera. Kada uno de mozotros, tenemos menester de ser estudiantes kada diya porke estamos en una epoka de asierto i de enformasyon. Los medios de komunikasyon mos estan prokurando todo modo de enformasyon. El kargo de las maestras esta ogmentando de diya en diya. Kada diya, los edukadores estan bushkando muevas teknikas para pueder arivar a este objektivo de la mijor manera. Las maestras estan partisipando en kursos para developar muevos metodes de ensenyansia, para ambezarsen las novedades de la teknolojia i las muevas metodes de edukasyon. Eyas mezmo se estan aziendo elevas para pueder alkansar a la reforma de edukasion.
Oy, mas de siempre, las maestras tienen menester del suporte i del protejo de los governos i del puevlo para pueder sostener el kargo de estas responsabilidades.
