Estas frazas ke vos va eskrivir, amostran komo las kozas ke mos plazen o ke valorizamos en la vida de kada diya, se pueden enterpretar de maneras diferentes kuando las sirkonstransyas trokan.
- Los kaveyos de la amada o de tu ijika son muy ermozos, los fishugas, los ves en tus esfuenyos i son presyozos para ti. Ma si estos mizmos kaveyos salen de aryento de la komida, te askeyas.
- Kuando beves una supa o komes una komida muy savroza, te komes i los dedos tanto te plaze, kuando te sarpika ensima el fostan, es una koza de desplazer.
- Kuando estas en tu kazika repozada o en tu kamika, si oyes la boz de la luvia, te plaze muncho, te da paz a la alma… ma si estas en la kaye, no kreyo ke tu alma va estar muy oroza.
- El konsejo de tu amiga, es presiozo ma si estos biervos vienen de tu mama, te enfasya.
- Una tasa de kafe ke beves la demanyanika, te da enerjiya para ampesar el diya, ma si lo beves la noche, no te desha durmir.
- El korrer de un ijiko en el parko es enerjiko i ermozo, ma kuando esta aryento de la kaza, kansa.
- Una surpriza dulse en el diya de kumpleanyos traye alegriya, ma kuando viene un musafir sin dar haber, traye stres.
- El guezmo de una komida savroza afuera, da gana de komer, ma kuando esta golor keda aryento de kaza, ampesa a deranjar.
- El sol fuerte en lo ke estas en vakansas es maraviyozo, ma kuando estas lavorando te aze sudar.
- El kante de los pasharos son muy dulses, ma kuando te espertan muy demprano la demanyanika ke estas durmiendo, te inyerva.
- Kuando meldas un livro enteresante, tomas plazer ma kuando kale ke lo meldes por leson en la klasa, se aze una tortura.
- Una tart en una fiesta es delisyoza ma kuando estas en dieta, te aze sufriyir.
Las ermozuras de la vida en vezes ganan su sentido solo kuando estan en su lugar i en su tiempo. Algunas kozas son ermozas solo en su propio konteksto. Por esto ay ke savorear kada momento en su lugar. La vida se enrikese kon chikas kontradiksyones i armoniyas. Bivir el momento es ver la ermozura de kada koza en su lugar.
