Kada diya mos alevantamos i salimos a la kaye para kumplir muestros deveres. Para lavorar, empleyar, tomar ayre, vijitar i pasar buen tiempo.
Para kaminar eskojemos todo modo de kalsados konfortavles para estar siempre repozados. I si tenemos un kuerno, ni avlar. Es tener el Satan en el puerpo i ensima mos se toma el suluk. Klaro ke kuando estamos en kaza tenemos pantuflas i charukas; antes mizmo para el banyo teniyamos galechas. Kon el tiempo todo troko. Ama aze 4000 anyos en Misrayim se toparon sandaletas echas de papirus. Munchos modelos de sapatos fueron enkontrados en Iran. 2500 anyos antes en Roma empesaron a azer sapatos por el pie derecho i por el pie siedro.
En el siglo 13 en Inglatera, sapatos puntudos eran muy de moda. En la epoka del Renasimyento fueron uzados sapatos kon talones altos. Porke en akeya epoka las mujeres vestiyan siempre fostanes largos, los sapatos kon talón fueron uzados tambyen i por los ombres. El rey Louis XIV vestiya talones muy altos. Kon el tiempo los ombres uzaron talones muncho mas kurtos mientras ke las mujeres tuvieron preferensya a talones altos.
En Italyano ‘Stilo’ keriya dizir punyal i los talones finos i altos fueron yamados ‘Stiletto’. En Roma las kolores de los sapatos fueron reglementados. Ombres no puediyan vestir sapatos de kolor amariyo, kolorado, vedre o blanko.
En el Imperyo Otomano, los Muzulmanes puediyan utilizar la kolor amariya. Los Ermenis el kolorado, los Gregos preto i los Djudos mavi (azul).
En la epoka Otomana los maestros tenían sus kapachidades i kada uno aparteniya a una organizasyon privada (Londja). Papuch keriya dezir “Pa=-Pye” “Push=Tapar”, i así papuch era lo ke tapava el pye. De mizmo chapeyo era Serpush. “Ser=Kavesa” “Push=Tapar”. En esta epoka, komo el imperyo era muy grande, kada rejyon teniya su tipo de kalsado ke korespondiya a la sezon, por tener enveranos kalorozos o inviernos rigurosos. Rugan keriya dezir kuero lustrado, i sued es un kuero preparado muy espesyalmente i mas godro. Kalsados ke se aziyan de kuedras se yamaron Espadril i al empesijo fueron uzados por los paizanos Espanyoles i despues se izo de moda para vistirse en el enverano. Las makinas de kuzir ayudraron a la fabrikasyon de sapatos i İtalya fue el numero uno de la moda por los sapatos elegantes. El Sultan Selim 3, izo prosperar este ofısyo i el kuero fue un lavoro muy importante. "Tabakhane" se yamava el lugar ande se lavorava el kuero. Las Tabakhanes deshavan una golor muy dezagradable i no se porke, eran lo mas Djudyos ke lavoravan aya.
Las pantuflas, i las charukas, se utilizavan a la entrada de las kazas, para no ensuziar las kamaretas, i kon los sapatos ke se uzavan en la kaye no se entrava a la kaza. El lodo i el polvo de las kayes kedavan afuera de la kaza. En el Japón es de uzo de kitar también las pantuflas de kaza para entrar al banyo. En el banyo tienen pantuflas espesyales ke empleyan solo en el banyo i kreyo ke son echas de tavla. Los chinos teniyan “tokyos” de tavla. En Evropa los payzanos se metiyan sapatos de tavla ke yamaron “Sabo”.
En Misrayim i los Sumeryos gerreyavan los piezes desmudos. Para dizenyar una persona mareyada se dize meter el kalsado derecho al pye siedro. Los primeros ke utilizaron las chizmes fueron los nomados. En el empesijo, los sapatos por el spor eran de lastik i tela i fueron empleyados solo para el spor. Ma mas después, kon el tiempo, para pareser mas mansevo i en buena forma, se empesaron a vistir kon vestidos i kravatas, i kon pantalones kot. La marka Kot fue muy de moda.
Kalsas: en Evropa las kalsas no se konosiyan, i la palavra kalsa teniya su rais del Latin: "Soccus" ke keria dezir ‘Kalsados muy livyanos’ En los anyos 1938, la famiya Dupont, ke pasaron de Fransya a los estados Unidos, i kon los ilos ke vendieron a las fabrikas, empesaron a vender las kalsas de naylon. En la segunda gerra mundial, las kalsas entraron al merkado negro i se vendieron muy muy karas. Las kalsas komo eran finas, las mayes se rompiyan i las kalsas se desfılavan. Para adovarlas aviya butikas ande lavoravan chikas ke las yamavan ‘remayoz’.
En muestros diyas ya no se adova kaji nada. Es un dor ke lavora i gasta toda su moneda para vestimyentas i komer en los restoranes, o enkomendar la komida a través el telefon. Pasar el tiempo en la kozina es “out”, pasar buen tiempo sin pensar demaziado al futuro es “in”.
Ke será será. Bivir i ver.
