Ya vos konti unas kuantas vezes de las savores ke mos kedo en el panadar en los paizes i sivdades ke vijitimos. Oy vos kero kontar sovre la spesyalita de Espanya, las TAPAS ke komimos ke komimos ke komimos en un restorante en el viyaje ke izimos a Andalusya. En primero vos esplikare kualo son Tapas, porke se dize Tapas. Ay unas kuantas konsejas ma yo vos kontare la ke se save mas muncho. En el siglo 19, el rey Alfonso se va a Cadiz. El meyanedji de Cadiz se apareja para darle un buen vazo de vino i al lado kon una revanada de pan i ensima kon jambon. Akel diya aviya muncho ayre. Los polvos para ke no kaygan aryento de la kupa del vino savrozo, la revanada de pan lo mete ensima de la kupa i lo tapa el vazo del vino para ke no se incha de polvo. Kuando viene el rey, le plaze este revanada de pan i le da orden al meyanedji para ke le apareje mas de estas revanadas. I desde akel diya en delantre estas revanadas se yaman TAPAS. Estas Tapas se aparejan kon todo modo de mezelikes. Kon guevos, mayoneza i trushi, kon karnes de sharkuteria komo salami, pastrami i jambon. Kon pishkados salados, komo sardalyas, somon i tuna. O si keresh kon todo modo de kezo ensima kon tomat i pipirushkas ets. Kuando damos orden al garson, tomamos unas kuantas Tapas diferentes para gostar i al lado kon un vaziko de vino es muy savrozo de komer. Si keresh voz dare la resefta solo de uno ke komimos i ke moz kedo la savor en la boka. Vash a tomar una revanada de pan ke seya un poko grande. En primero se va tostar, despues ke se tosto se frega un diente de ajo a este revanada, i ensima se echa un poko de azete de oliva. Del otro lado se apareja la sevoya blanka i la domat kortada komo los dados de tavli. Se mete ensima de la revanada del pan tostado. I en fin una sardalya salada kon un poko de azete. Si vos plazyo esta resefta aparejavos unas kuantas Tapas i despues ke vash a komerlas kon grande savor, vos akodrash de mi.
