El 7 de novembre diya de djugeves, estuve envitada a la fyesta de tefilin del ijo de CENK i LİZET ROFE.
Cenk Rofe se engrandesyo en los kulises, en las shenas i en los teatros del Dostluk Yurdu Derneği. Apenas teniya onze u dodje anyos djugava rolos grandes i kantava kon su boz ermoza en los muzikales. Kon tyempo se engrandesyo i en las provas del djugo famozo KULA 930, se konosyo kon Lizet, se ennamoraron, se kazaron i tuvyeron un ijo nombrado CAN.
Estuve envitada a la boda de Cenk i Lizet, dospues al berit mila de CAN i agora a la fyesta de Barmitzva.
En deskorsando CAN, me emosyoni muncho mezmo me kayeron las lagrimas.
Me burlava de mi mama kuando mos ivamos a las bodas, en entrando la novya yorava. Le diziya:
“Mama ke estas yorando, estamos en la boda no en el funeray”.
Kijo dizir a la vejes, me esto azyendo emosyonal (syempre fui ma no lo amostro).
En fin, grasyas Cenk i Lizet ke me onoratesh. Vos oguro un ijo de buena ventura, el Dyo ke mos ayege a ver su boda.
En el dezayuno, mos topimos kon los amigos vyejos del Dostluk. Todos estavamos en mezma idea, la konversasyon fue los diyas pasados i las ermozuras ke izimos. Los teatros, las turnes, las nochadas maraviyozas.
Rendevos kuento, yo teniya a la semana 2 u 3 vezes provas de teatro, reunyones de ovras, el koro de kantikas sefaradis “NES”, aparejar programes para los aedados, fyestar los moedes komo Hanuka, Purim, Simhat Tora, aparejar para el Dia Internasyonal del Ladino, para el Diya de la Kultura Djudiya i mas.
Orozamente ke me vo a los kursos, a los koros de muzika Turka, me kontento kon las eskritas seya al ŞALOM, EL AMANESER i İYT. Ma atorgare no me esta abastando.
Dar konsejos no me plaze, porke no me plaze ni a mi ke me den konsejos, por siguro ke tomo ideas de los ke saven mas muncho de mi ma oy va mandar un mesaje a las dammas de mi edad, ke me dizen:
“Mozos dospues de esta edad kualo puedemos azer?”.
Puedesh azer munchas kozas keridas!
Todo no es djugar teatro, no tenesh talento de djugar teatros, andavos a ver las pyesas ke estan djugando, ay ekspozisyones muy enteresantes, ay kursos de todas maneras, ay livros ermozos de meldar, oyé muzikas diferentes, es muy emportante de tener una koza de azer, toma egzempyo de los diyas de pandemiya kuando estavamos serrados en kaza i enprezados, keriyamos azer i no estavamos puedyendo. Agora ke estamos libres, vos rekomendo de azer todo lo ke puedesh.
Porke no mos kedo muncho tyempo.
