Donald Trump anunsyó su prezidensya en dizyendo ke va terminar la gerra en el Medio Oryente. Fue el primer en la kompetisyon kon Kamala i gano 267 delegados.
En su primera avla disho: “Reushimos al mas grande sukseso en la istorya en ganando esta prezidensya. Agora sera la epoka de ORO de los Estados Unidos.
Rekuperimos el kontrol del senato i yo va serrar las frontyeras, solamente las personas van a entrar al paiz kon el kamino legal, konforme a la ley”.
De otra vanda Donald Trump tambien disho, “Keremos tener una armada fuerte, ma no keremos uzarla, no keremos gerras. Yo no va azer empesar una gerra, vos esto prometyendo ke va terminar las gerras en el mundo entero”.
En la Amerika, en la eleksyon de la prezidensya 2024, uno de los estados mas grandes del paiz, “Texas” fue ganado por Donald Trump. El reushó a ganar 40 delegados en Texas.
Agora todos estan merikeyozos por la politika entre Trump i la Turkiya. La kompetensya ekonomika kon la China, estava en la ajenda prinsipal de Trump. Va aprovar rapidamente medias politikas, diplomatikas i legales, para pueder eskabuyirse de esta kompetensya, ke esta aminguando las ganansyas de las empresas i del governo de los Estados Unidos. Donald Trump no va tomar siguramente una desizyon kontra Israel.
Binyamin Netanyau kon Trump tyenen buenas relasyones. En mizmo tyempo Trump es entimo i kon Erdoğan.
Todos los presidentes de los paizes del mundo estan felisitando Trump de su viktorya. Kamala Harris kayo en silensyo. Asigun los rezultados, Trump por ser elejido gano mas de 270 delegados, aserke Kamala gano 224 delegados.
Trump gano 71 milyon de votos, su rival Kamala Harris gano 66 milyon de votos. El tyene 78 anyos i kuando va tornar a la Kaza Blanka, aviya prometido de kastigar i tomar vengansa. El va azer la mas grande deportasyon de los emigrantes, va augmentar los derechos de la douana, i va terminar las gerras en la Ukrania i en el Medio Oryente.
Ma nunka ekspliko komo va azer esto todo.
Netanyau fue el primer ke lo felisito kuando tomo la otorita, en dizyendole ke esta ganansya es una grande viktorya. El prezidente de la Inglaterra, disho ke esta asperando impasyentamente el dia ke van a lavorar kon Trump endjuntos. “Komo muestro alliado el mas serkano, muetras valores komunes son la Liberta, la Demokrasiya i las Tentativas ke keremos defender, i por esto todo estamos ombro kon ombro." El prezidente de la Ingleterra disho ke la relasyon espesyal entre eyos kon los Estados Unidos va kontinuar en enfuertesiendosen.
Donald Trump disho: “Para ser onesto komo politiko, fue el paso el mas grande i maraviyozo en la istorya del mundo. Esto orgoyozo de ser el prezidente numero 45 i 47 de los Estados Unidos. Va luchar kon todas las selulas de mi puerpo por vozotros. Esto lavorando para garantizar ke muestros ijos veyan el futuro ke meresen. Esto va ser la epoka de oro de la Amerika. Ay una inkreible inondasyon de amor en esta grande multitud de personas. Es un sentimyento maraviyozo de estar entre vozotros. Un dia kuando me va akodrar del pasado, va pensar ke pasi un tyempo muy orozo kon esta ekipa, kon estas personas laboryozas i yenos de amor. Esto va ser un rekuerdo de no va pueder olvidar en mi vida”.
Amerika mos mostró una reushita maraviyoza.
