Dospues de la avyertura de la ekspozision de la ekspozision de las Ketubas Otomanas i Turkas es Edna Sarfati del Şalom ke me bushko dizyendo ke estan organizando un grupo para un viaje en un vapor en el Rio del Danube (Tuna); empesando de Viena ,kapitala de la Austria, i pasando por Estergon, Budapeshte, Bratislava i ke se termina en Viena. Solo sinko diyas en un vapor luksuozo kon syen i sinkuenta personas. Eramos un grupo de 24 personas. Reelmente fuimos muy kontentes de este viaje. De las komidas ke mos ofresieron. De las sivdades ke vijitimos. Del giador ke mos prezento las sivdades ke vijitimos. Kon esta prestor, reelmente mos kansimos.
Diya de alhad, la famoza Berta la Çanakkaleliya i el senyor Avi Alkaş firmaron sus livros. Avli kon Feride Petilon ke era una de las organizatrisas i me disho ke fue un diya bastante reushido. I yo reelmente fui muy kontente de este rezultado.
Es noche de Shabat ke estamos envitados por la Prezidensya de Komunikasion de la Prezidensia del Estado Turko por la prezentasion del filmo sovre el artisto de fotografia, İzzet Keribar: “Una fotografia de Keribar - Bir Keribar Fotoğrafı”. Esta prezentasion va ser realizada en el Otel Rixos, Tersane Istanbul. Un ombre ke kon sus mas de un milion fotografias reusho a formar una memoria en Turkiya i en el mundo. Mos estan yamando a partisipar al viyaje ke realizo toda su vida detras del arte i de la fineza. Sueto una grande reushita al Senyor İzzet Keribar ke merese una onor asemejante.
Un otro sujeto de mi artikolo es el muevo livro del famozo artisto de karikaturas, İzel Rozental. Estavamos endjuntos en el viaje de Viena. I tuve la posibilidad de avlar sovre su livro. “La Tiya Anjel ke no tuvo mazal - Talihsiz Anjel Hala”. Anjel Gueron era la direktrisa de la Eskola de las ijas de la Aliansa de Edirne. I dospues ke Edirne fue enserklada por los soldados Bulgares eya, las otras maestras i syertos elevos lavoraron kon las makinas de kuzir, para ayudar los soldados Turkos. En primero es las Publikasiones ISIS ke publiko estas memoryas de Angele Gueron en fransez en el 2002. I esto fue tresladado al turko por el Sinyor Rıfat Bali i fue publikado en la revista “Tarih ve Toplum”; los nuımeros 32-33 i 34 del anyo 1999. Reelmente kero felisitar İzel Rozental por el livro ke eskrivyo i publiko. Reelmente fue un livro muy emportante por la sivdad de Edirne.
