El prezidente de Argentina, Javier Milei nomino a Geraldo Werthein, komo ministro del Ministerio del Eksterior del paiz. Werthein es un empresario judio i viejo embasador de los Estados Unidos.
Los antepasados de Werthein se fuyeron de la persekusion judia de Rusia en el empesijo del venten siglo. Gerardo Werthein empeso su mision duspues de la seremonia de la inogurasion en el sentro de Buenos Aires. En un paiz ande la majorita del puevlo es katoliko, es muy inuzual ke un ministro meta su mano enriva la Tora, i djure ke va mantener su pozision kon fidelidad. En una otra reunion del protokolo, en su diskorso, Milei, meldo una parte de la perasha de la semana. Anturado por soldados kon uniformas seremoniales, Milei enfrento Werthein ke estava emosionado i le demando si kere djurar enriva la Tora para akumplir esta mision patriotika. Werthein metio su mano enriva la Tora i disho “Lo prometo”. Los dos ombres se abrasaron durante unos kuantos segundos mientres ke el publiko estuvo aplodisando.
Werthein, ke tiene 68 anyos, es un empresario de telekomunikasiones. Su famiya es una de las mas influentes del paiz. Werthein tambien es veterinario. Mas antes, los judios izieron misiones komo ministros ke tienen preeminensya en Argentina. Uno de estos es Hector Timerman, el viejo ministro del ministerio de eksterior, entre los anyos 2010-2015.
Admetiendo los karakteristikos inuzuales de la inogurasion, Milei disho: “Komo oy mos aleshimos del formato konvensional i tradisional i ke el djuramento se realizo sovre la Tora, pensi ke va ser apropriado de avlar sovre la perasha de la semana” disho el prezidente, aziendo referensia a la perasha Leh Leha. “Las fuersas del sielo te estan enbiando sinyales, Gerardo. Esta avlando del empesijo del torno del mundo de Avraham espandiendo los mesajes del Kreador. El Dio le disho ke va tener muncha influensia enriva las nasiones del mundo i le dio una importante responsabilidad de yevar los mesajes de la Tora, de la vida i de la libertad al mundo entero. Reushita i bendisiones”, disho Milei.
El ministro del ministerio de eksterior israeliano, Israel Katz, kalifiko esto komo “un jesto emosionante” ke esta reflektando la “profonda i verdadera koneksion de Milei kon el puevlo judio i el Estado de Israel”. En un tweet del martes X, Katz avlo estos biervos: “Estamos valorizando la fidelidad del prezidente Milei a la amistad entre muestros puevlos, i esto ogurando muncha reushita al ministro del ministerio de eksterior Werthein. Esto seguro ke endjuntos vamos a fortaleser los lazos entre muestros dos paizes”.
Werthein finanso el viaje de Milei a los Estados Unidos despues de su eleksion el anyo pasado. Los dos ombres vijitaron endjuntos la tomba del rabino Menachem Mendel Schneerson de Chabad en New York. Milei es un populisto de la derecha ke prometio de reformar la ekonomia problematika de Argentina despues de dekadas de administrasiones nepotistas del sentro-derecho i del sentro-siedro. Tambien prometio de revolusionar las relasiones eksteriores de Argentina. El prezidente de Argentina no es judio, ma munchas vezes estuvo avlando de su koneksion spiritual kon el judaizmo. Disho ke los prinsipales aliados de Argwntina son los Estados Unidos i Israel.
