El 23 de Novembre a la ora 2 de medyo diya tuvimos una reunyon en la gazeta ŞALOM. Aviya buen karar de tyempo ke no mos arekojiyamos en bivo, ver a todos los eskritores i mezmo muevos eskritores mansevos me alegri muncho. Porke el tyempo de la corona ovligadamente estavamos azyendo todas las reunyones en ZOOM. Malorozamente kedo de uzo i oy en diya, munchas reunyones se estan realizando en Zoom. Vos dire la verdad, kuando esto meldando el mesaje i esto vyendo el kodigo, no esto tomando plazer i munchas vezes no esto partisipando. Kuando me vino el meil de esta Reunyon, aunke tengo en la mezma ora el kurso de muzika Turka preferi ir a la gazeta.
La Reunyon empeso kon las ermozas pizzas i tratamentos, en bevyendo kafe tomo la palavra el editor jeneral de la gazeta, İVO MOLİNAS, mos aklaro de syertas periodes, de projektos muevos i tomo ideas de kualkunos para kontinuar a azerla bivir esta gazeta ke es unika en Turkiya. Un poko dospues vino el musafir ke estavamos asperando a ojos a ojos.
Istoryador, akademiko i eskritor Turko, myembro onoraryo de la Sosyeta Istorika Turka, en mezmo tyempo myembro del Komite de Estudyos Otomanos i myembro de la Sosyeta Eropea de Iranolojia i del Foro de Siensyas Austo-Turko, Profesor İLBER ORTAYLI.
İlber Ortaylı nasido en Austria Bregenz, su famiya prefero bivir en Turkiya. Kompleto su edukasyon primera en Estanbol i Ankara. La eskola segundarya la eskapo en Ankara, dospues entro en la Fakulta de Siensias Politikas de la Universita de Ankara en el Departamento de Istorya de la Fakulta de Lingua, Istorya i Jeografiya.
Kon su avla muy sempatika, mos aklaro en munchos sujetos, komo istorya, jeografiya, sosyolojiya i politika.
Me esparti de aya kon glorya de ser un myembro de esta famiya. Estos i munchos, ŞALOM.
