Es noche de djueves ke me ambezi ke muestro amigo Elio Medina mos desho la buena vida. Amigo de mas de 55 anyos lavorava por el Amical-Arkadaşlık Yurdu- en su manseves. Lavoro munchos anyos para el Ospital Or Ahayim. I fue prezidente antes del prezidente aktual, Yaşar Abuaf. Es dospues ke fue prezidente del Fakirleri Koruma. Lavoro munchos anyos para la Komunidad Djudia de muestra sivdad i de muestro payiz. Durante la seremonia de los funerales de oy, tres personas tomaron palavra para avlar sovre Elio Medina. Yaşar Abuaf tomo la palavra representando el Or Ahayim; Ceki Kazmir representando el Fakirleri Koruma i su amigo de chikes, Hayim Behmuaras avlo sovre Elio Medina. Kero dizir ke fue el diskorso el mas influente. Reelmente avlo komo estava meldando. I lo konosiya bastante. Es su ijo Avi ke le dyo una parte de su organo, i paso una transplantasion de organo ke reusho ma tuvo otras komplikasiones. Es su mujer Gila ke le ayudo bastante i reusho a bivir unos kuantos anyos. Elio, ke tu alma repoze en Gan Eden.
Una noche dospues estavamos invitados a la demonstrasion del filmo, en la sala de Balo del Otel Rixos Tersane en el bodre del Kuerno de Oro entre Kasımpaşa i Hasköy; preparado en la onor del famozo artisto de fotografias, İzzet Keribar. “Una Fotografia de Keribar - Bir Keribar Fotoğrafı” era el nombre del filmo. Es la Prezidensia de Komunikasion de la Prezidensia ke izo estos esforsos para realizar un filmo asemejante sovre İzzet Keribar. Ya se ke este filmo va ser mostrado en Netflix. Va ser reelmente un onor para el artisto de fotografia, İzzet Keribar. En el filmo de 90 puntos, se esta kontando el amor de İzzet sovre la fotografia de su manseves asta muestros diyas. Ya savemos ke İzzet Keribar resivyo munchos premios i sus fotografias fueron publikadas en diferentes revistas del mundo. El fue miembro de los juris en las kompetisiones de fotografia. Ombre modesto, İzzet reelmente fue onorado kon este filmo.
