El prezidente de Arjentina Javier Milei tomo una desizyon, ke asta agora no se aviya oyido. Esto era para renforsar las relasyones entre la Argentina i el mundo judio. Izo djurar al muevo ministro de las Relasyones Eksterioras de Argentina Gerardo Wertheim, sovre la Tora en la seremoniya de djurar i despues Milei avlo sovre la sagrada mision de Avraham en su diskorso.
En la seremoniya ekstraordinarya organizada en el Parlamento de Arjentina, se suivo un kamino diferente de los protokoles del estado ke se tomo en las seremoniyas de antes. Mizmo antes de la seremoniya aviyan avlado de Milei ke aviya ekspedido a la ministra Diana Mondino, porke aviya votado en favor de anular el ambargo de los Estados Unidos kontra Kuba i metyo otra persona a su lugar.
Milei avlo en la seremoniya i disho: trokaremos el orden de muestra seremoniya tradisyonala i djuraremos sovre la Tora. En este kavzo, seriya mas djusto de avlar sovre la perasha de esta semana, Leh Leha de la Tora. “Esta en tus manos, Gerardo, de valorizar i tomar el mesaje ke te mando el Dio.”
El prezidente munchas vezes apoyo Israel kon sus deklarasyones ke diziya “kero ser komo Israel”, i “Esto kon Israel ke esta gerreyando kontra el areskuro”. Milei adjusto: “La perasha mos avla de los viajes ke izo Avraam en el mundo entero para propajar el mesaje del Dio. El Kriyador, dyo a Avraam la responsabilita de ser intermediaryo para propajar los mesajes de la Tora ke mos avla de la vida i de la liberta”.
La djura en la seremoniya estava espesialamente muy emportante. Milei demando al ministro ke iva djurar: “Onoravle Gerardo Wertheim, puedes djurar delantre del Dio i tu patriya i por la Tora ke vas a kumplir, kon fidelita i devuamiento, los deveres de Ministro de Relasyones Exteriores, Komerso Internasyonal i Temas Relijiosas de tu payiz?”. Despues de la repuesta pozitiva del ministro, Milei eskapo sus komentarios en la seremoniya, en dizyendo: Si no kumples estos deveres, lo mejor ke puedras, komo djurates, Dios i tu nasyon te van a tener responsavle”.
Milei ke se ato a las tradisyones djudiyas, komo dingun otro politisyano arjentino no lo teniya echo antes, esta sosteniendo egualamente, aviertamente a Israel.
Milei enkontra regularmente un rabino de su payis i estudia los tekstos del livro sagrado, tanbien apoya el movimiento Habad, ke se espandio en munchos payises. El, realizo su primer viyaje a Israel komo prezidente de la republika, i deklaro su unidad kon el puevlo Israeli en el Kotel. Izo deklarasyones sovre la emportansa ke el da a la seguridad de Israel i avlo de los planos de Arjentina de transferar la ambashada de Israel a Yerushalayim.
Vineremos a identidad del ministro Arjentino Gregorio Wertheim. Wertheim nasyo en una famiya rusa de orijina djudiya. So bis-nono emigro de Besarabia a Arjentina en el anyo 1904 kon su mujer Ana i sus 4 ijos Gregorio, Eliza, Numo i Israel. Eyos estavan fuyendo del pogrom i persekusyones del Imperio Ruso, kontra el puevlo djudio. En Arjentina ampesaron a elevar bestyas i kon tiempo se izieron uno de los mas emportantes holdinges ke se yamava “Wertheim Group”. I despues se izieron los patrones de la sosyeta de telekomünikasyon “Telecom Arjentina”.
