Kon el grupo ke viyajamos ke se yama BTS “Viyajar es una pasion” mos fuimos a Sud Amerika. A Argentina, Uruguay i Brasil. Kaminimos i vimos lugares muy enteresantes.
Yo oy vos kero kontar las savores ke mos kedo en el panadar. En Sud Amerika las karnes son muy savrozas. Ya se saven en el mundo entero el Barbekyu ke azen las karnes asadas son maraviyozos. Mas de esto, la spesyalidad del Sud Amerika es la Empanada. Empanada es komo un borek o borekitas. Mas muncho se aze kon sarsicha. A vezes kon kezo, patatas o si no kon ispinaka. En los restoranes para empesar se kome esta empanada kon sarsicha.
Tambien i en las kayes i en los kafes se vende. Un diya mos yeveron a una granja de kavayos. En entrando mos tomaron de la puerta kon vistimyentas komo se visten en la Granja. Mos daron a kada uno Empanadas. Yo porke no komo kon karne me aparejaron kon kezo i prishil. Me plazyo muncho. Todos ke komyeron la Empanada kon sarsicha se chuparon los dedos. Le demandi ke me de la resefta. Agora vos kero eskrivirla para vozos.
En primero se apareja la masa:
1 Guevo
1 Kuchara de dulse de vinagre
½ Kupa de agua
3-4 Kupas de arina
1 Kuchara de dulse de sal
Para el gomo de aryento:
200gr de Sarsicha
1 Sevoya
2 Kucharas de komer de azete
1 Pipirushka
10 Ramas de prishil
½ de Kuchara de chay de sal
½ de Kuchara de chay de pimyenta
Antes de meter al orno se unta ensima el amariyo del guevo kon un poko de agua.
En primero el guevo, el vinagre i la agua aryento de un bol se batea. Despues la arina i la sal se mete aryento de esto i se mete kon un strech aryento del frijider i se aspera 45 minutos.
En asperando se apareja aryento de una kacharola la sevoya kon la pipirushka, la sal i la pimyenta se friye. Despues ke se yelo, se mete el prishil a este gomo i se karishtereya.
La masa ke se deskanso 45 minutos se toma komo topizikos chikos i se avre. Aryento de esta masa se mete la sarsicha ke se aparejo i se sera komo boreka i en los bodres kon un piron se da un dekor. Ensima se unta el amariyo del guevo kon un poko de agua. Despues se mete al orno kon 180 grados de kayntura kaji 30 minutos. I despues se kome si keresh la demanyana en el dezayuno kon chay o si no la noche kon una birika yelada.
