Kerido “Elyo Medina”, sirvites muestra komunita en diferentes asosyasyones i organizasyones kon devosyon, izites la prezidensya del ospital Or-Ahayim i “Fakirleri Koruma Derneği”, fuites konsultante del Rabinato, kon tu personalita modesta, syempre kon kara riyendo, ganates el amor i el
respekto de todos mozotros, fuites util en todo modo de espasyo, ke tu alma repoze en gan-eden (z"l).
Esto muy triste de peryer un amigo koma ti, syempre koryendo a los ke tyenen menester, a los evenementos kulturales, topando solusyones diferentes, azyendo novedades intelijentes en todo modo de espasyo. Fuites un pionaryo kon tu enerjiya infinita, en eventos enteresantes. Kon tu vizyon ancha, kon tu personalita konstruktiva i kon lavorar muncho ganates la kerensya i el respekto de todos ke estavan en tu entorno.
La operasyon ke pasates antes sinko anyos, la transplantasyon del igado, fue un momento krusial para ti, mizmo si la operasyon fue reushida, a kavza de tu ijo “Avi” ke dyo su igado ke era kompativle.
Despues de un largo tyempo ke estuvitesh en el ospital, tu i tu ijo, tu kerida mujer, Gila, te sano kon su tratamyento metikulozo. En estos sinko anyos tuvites dias buenos i dias mas negros kon desfuersa i otros efektos segondaryos.
Ma no peryites el guste de bivir, de eskrivir i de azer umor. Kuando avlavamos en el telefono diziyas, Baruh Ashem, ya esto mas bueno i va a estar mas bueno. No peryites la esperansa i te detuvites a la vida.
No te gozates malorozamente de tus inyetos i inyetas.
Tu karakter i tu personalita onesta, te izo kerer byen a tu famiya, amigos i aliados. Eras un ombre muy kultivado, reushido en la vida komersyal, bushkado en la komunita i popular, amado entre los amigos.
Meir Gaon z"l, mi marido te keriya muncho byen i te agradesiya por la prezensya spiritual ke teniyas.
Tu ida es una grande peryita por muestra komunita i por tu famiya.
Esto ogurando pasensya i fuersa a tu kerida Gila, Avi, Riella, Moris i sus espozos kon los inyetos.
Ke tu alma repoze en Ganeden i ke tu kamino seya yeno de luz, mi muy kerido aliado.
