‘En el anyo1991, asendi las kandelas de Hanuka kon Mihail Gorbachov’ esta diziendo el rabino Jonathan Sacks. ‘Asta el empesijo de este anyo, Gorbachov kontinuo su mision komo prezidente de la Union Sovietika’.
‘Por setenta anyos, la pratika del judaizmo fue prohibido en la Rusia komunista. Esto fue una de las dos grandes atakes a muestro puevlo i a muestra fe en el venten siglo. Los almanes kijeron matar a los judios; los rusos kijeron
matar el judaizmo. En la epoka de Stalin, el atake fue brutal. En el anyo 1967, despues de la viktoria de Israel en la Gerra de Sesh Dias, munchos judios sovietikos kijeron abandonar la Rusia i ir enstalarsen en Israel. No solo no les dieron el permiso, ma tambien estos judios perieron sus echos i fueron enserrados en las priziones. En el mundo entero, los judios izieron kampanya para ke los prizoneros, yamados Refuzniks, seygan liberados i ke les permetan de irsen.
A la fin, Mihail Gorbachov se rendio kuenta ke el sistem sovietiko no sirvio a nada. El komunizmo no trusho libertad ni igualdad. Trusho represion, un estado polisial i una mueva hierarkia de poder. A la fin, todo se abatisio i los judios rekuperaron la libertad de praktikar el judaizmo i de ir a Israel.
‘En 1991, el dia ke asendimos las kandales kon Gorbachov, Gorbachov, kon el intermedyaryo de su interprete, me demando de eksplikarle la sinyifikasion de asender kandelas. Le dishe ke 22 siglos antes, en Israel, despues ke se prohibiyo la pratika publika del judaizmo, los judios lucharon por sus libertad i la ganaron, i ke estas luzes son el simbolo de esta viktoria.
Sacks kontinuo: ‘Setenta anyos antes, los judios sufrieron la mizma piedridad de libertad en Rusia, i agora vozotros mos ayudatesh a rekuperarla. Ansi ke vozotros fuitesh en partida de la istoria de Hanuka. I el interprete traduizo estas palavras al ruso. Mihail Gorbachov se chapeteo.
La istoria de Hanuka dainda esta biviendo, dainda esta inspirando, diziendomos no solo a mozotros sino al mundo ke, mezmo si egziste la tiraniya, la libertad, kon la ayuda del Dio, siempre a la fin va ganar la gerra.
